Папа сустрэўся з каралём Іарданіі

7 красавіка 2014 г. вечарам Святы Айцец прыняў на прыватнай аўдыенцыі ў Доме св. Марты Абдалу II. Гэта была другая сустрэча Францішка з каралём Іарданіі, наступная адбудзецца ў маі 2014 г. у ходзе візіту Папы ў Святую Зямлю. На сустрэчы з Пантыфікам прысутнічаў таксама прынц Газі бен Мухамед. Размова працягвалася каля 40 хвілін і прайшла ў сяброўскай і нефармальнай атмасферы, паведамілі ў Зале Друку Святога Пасаду. Візіт адбыўся ў кантэксце пілігрымкі Францішка ў Святую Зямлю. Кароль Абдала ІІ паведаміў, што народ Іарданіі рыхтуецца да сустрэчы з Пантыфікам. Ён выказаў сваю адкрыць да супрацоўніцтва ў міжрэлігійным дыялогу.

Манарх наведаў Ватыкан у рамках свайго еўрапейскага падарожжа, галоўнай мэтай якога з’яўляецца Масква. Ён мае намер размаўляць там пра сірыйскі крызіс, які моцна ўплывае на сітуацыю ў Іарданіі, перш за ўсё праз сотні тысяч бежанцаў, размяшчэнне якіх складае для малой краіны сур’ёзную праблему.

52-гадовы манарх узышоў на трон ў 1999 г. У 2000 г. адбыўся візіт у Іарданію Яна Паўла II, а ў 2009 г. – Бэнэдыкта XVI.