Чалавек не можа самастойна
выйсці са свайго граху, адзначыў Святы Айцец. 8 красавіка 2014 г. падчас гаміліі на
ранішняй Эўхарыстыі ён прапанаваў свае разважанні над фразай Хрыста, скіраванай да
фарысеяў: “памрэце ў грахах вашых”. Яны верылі ў Божае прабачэнне, але разам з тым
былі самаўпэненымі, ператварылі рэлігію ў культуру каштоўнасцяў і вызначаных паводзін.
Хрысціянства – гэта не філасофскае вучэнне, гэта не праграма выжывання, спосаб адукаванасці,
канцэпцыя міру, адзначыў Пантыфік і дадаў, што гэта проста наступствы. “Хрысціянства
– гэта асоба, чалавек, Які ўзняўся на крыжы, Які знішчыў сябе, каб збавіць нас – стаў
грахом”, - падкрэсліў ён, гаворачы аб Хрысце. “Не можна зразумець хрысціянства, не
разумеючы гэтага глыбокага прыніжэння Сына Божага, Які ўпакорыў сябе і стаў слугой
да смерці, смерці крыжовай”, - дадаў Святы Айцец.
Францішак адзначыў, што ў
чалавека няма іншай рэчы, якой можна было б ганарыцца, апрача духоўнай беднасці. Але,
дадаў ён, дзякуючы Божай міласэрнасці, мы атрымалі магчымасць ганарыцца Хрыстом укрыжаваным.
Сэрцам збаўлення з’яўляецца Сын Божы, які ўзяў на сябе ўсе нашы грахі, нашы самаўзвышэнне
і ганарыстасць. Хрысціянін, які не ведае, што такое ганарыцца ўкрыжаваным Хрыстом,
не разумее, што значыць быць хрысціянінам, лічыць Папа.
Крыж, падкрэсліў Святы
Айцец, гэта не аздоба, якая змяшчаецца ў храмах, не сімвал, што адрознівае нас ад
іншых. “Крыж з’яўляецца таямніцай, таямніцай Бога, Які прыніжае сябе, стновіцца “нічым”,
становіцца грахом”, - адзначыў ён. “Твой грэх знаходзіцца ў крыжы”, - звярнуўся Пантыфік
да сабраных у капліцы Дому св. Марты і заклікаў кожнага шукаць свой грэх у ранах Пана,
дзякуючы якім ён быў адкуплены.