"Легіён Марыі" у Беларусі адзначае 20-годдзе свайго служэння
“Вера без спраў мёртвая”
– гэтай ісцінай з евангельскага паслання св. апостала Якуба і кіруюцца ўдзельнікі
“Легіёна Марыі”. Каталіцкая супольнасць, якая ў свеце налічвае больш за 13 млн. чалавек,
існуе ў Беларусі ўжо два дзесяцігоддзі – у жніўні 2014 г. будзе адзначацца юбілей
яе прабывання ў краіне. Сёння беларускі “Легіён” налічвае каля тысячы членаў. Палова
на палову – дамапаможныя, тыя, хто моліцца, і актыўныя – тыя, хто выконвае розныя
заданні. Аднак, як кажуць удзельнікі руха, у прынцыпе ўсе яны маюць адну місію – несці
Божае слова людзям, паведаміла Галіна Калевіч, старшыня каміцыўма “Легіёна Марыі”
у Беларусі.
“Сапраўды, яшчэ многія людзі не ведаюць Езуса Хрыста. Бывае такое,
што паказваем жанчыне абраз Езуса Міласэрнага, а яна пытаецца, хто гэта. У шпіталі
паміраў мужчына і прасіў, каб мы навучылі яго рабіць знак крыжа. Вось і такая наша
праца – ходзім у шпіталі, у асноўным анкалагічныя, гінекалагічныя. У нас ужо шмат
дзетак, якіх мы выратавалі ад аборту, і старэйшым ужо 17-19 гадоў. Таксама ходзім
у паркі, скверы, размаўляем з моладдзю аб чысціні, бо гэты свет тоніць у граху і амаральнасці”,
- сказала Галіна Калевіч у інтэрв’ю Ватыканскаму радыё.
Шпіталі, дамы састарэлых,
турмы, інтэрнаты і школы – вось тыя месцы, якія сістэматычна наведваюць “легіянеры”.
Пазнаёміць з імем Бога на самым пачатку ці дапамагчы спазнаць Хрыста амаль у апошнія
хвіліны жыцця – актывісты супольнасці сутыкаюцца з рознымі выпадкамі і людзьмі, у
тым ліку з крытыкай ці поўным адмаўленнем рэлігіі. Часта іх сустракаюць зусім не з
распасцёртымі абдымкамі, але менавіта гэта і ёсць, як кажуць, іх поле дзейнасці. Вера
і павінна быць дзейснай, паўтарае Мікола Бадрусёў, удзельнік супольнасці. Ён прыйшоў
да Каталіцкага Касцёла праз выпрабаванні і зараз ведае напэўна, што і справы без веры
– простая трата часу. У мінскай парафіі Божага Цела, дзе таксама існуе група “Легіёна
Марыі”, Мікола апякуецца некалькімі састарэлымі ўдзельнікамі руху, наведвае дзяцячы
сацыяльны цэнтр, а таксама дамы або кватэры простых людзей у сваім раёне.
“Мы
ходзім па кватэрах, сустракаем католікаў і даем нават інфармацыю, што касцёл знаходзіцца
ў нашым раёне. Напрыклад, бабульку (каталічку) нават прывялі да шлюбу, яна ўсё жыццё
пражыла без касцёльнага шлюбу, а ў такім сталым узросце павянчалася. І даведалася,
што нават і хадзіць далёка не трэба – касцёл побач. Я асабіста таксама размаўляю з
людзьмі на вакзале. Сутракаюцца сектанты, “сведкі Яговы”, напрыклад. Адну дзяўчыну
мы пераканалі адысці ад іх, і яна зараз праходзіць катэхізацыю і рыхтуецца да хросту”,
- сказаў Мікола Бадрусёў.
“Легіён Марыі” быў створаны ў ірланскім Дубліне па
ініцыятыве Фрэнка Дафа ў 1923 г. Апякаць кожную душу і працаваць для кожнага чалавека
– гэта, магчыма, адрознівае супольнасць ад іншых каталіцкіх рухаў ці свецкіх дабрачынных
аб’яднанняў. А яшчэ тое, што за 93 гады свайго існавання “Легіён” даказаў дзейснасць
і вернасць абранаму шляху. Невыпадкова 27 сакавіка 2014 г. Апостальская Сталіца афіцыйна
прызнала супольнасць “Легіён Марыі” у якасці міжнароднай асацыяцыі вернікаў з юрыдычным
статусам, прадугледжаным кананічным правам. 20 гадоў таму ў Беларусі “Легіён” ствараўся
па благаслаўленні кардынала Казіміра Свёнтка, падтрымліваў суствены рух і благаслаўлёны
Ян Павел ІІ, узгадвае гісторыю Галіна Калевіч.
“Я хачу працытаваць Яна Паўла
ІІ: “Ваша духоўнасць – гэта цалкам Марыйная духоўнасць. Вы імкнецеся служыць у духу
і з клопатам Марыі кожнай чалавечай асобе, якая з’яўляецца вобразам Хрыста”. І мы
маем гэтыя словы ў сэрцы. Таксама хочацца ўзгадаць словы кардынала Казіміра Свёнтэка,
які сказаў, што “Легіён Марыі” у Беларусі – супольнасць, якая выдатна сдае экзамін
на сваю веру. Сапраўды, запрашаеш людзей у супольнасць, а ня многія хочуць ісці і
несці слова Божае людзям, бо гэта не так лёгка, паверце, не лёгка”, - прызналася спадарыня
Калевіч.
Яшчэ асабліваць “легіянераў” у тым, што ў большасці не маючы спецыяльнай
тэалагічнай адукацыі, асабістым прыкладам і знойдзенымі ў час патрэбнымі словамі,
яны дасягаюць галоўнага выніку, якім з’яўляецца навяртанне да Бога. Колькасць “Легіёна”
у Беларусі прыкладна застаецца аднолькавай – сталыя адыходзяць ад спраў, але прыходзіць
моладзь – надзея і натхненне, смяецца Галіна Калевіч. Супольнасць мае нават моладзевыя
і дзяцячыя групы, якія таксама ўносяць сваю, і зусім не дзіцячую, лепту ў евангелізацыйную
місію. А разам з гэтым прапануюць новыя ідэі для далейшай працы.