Takimi i Atit të Shenjtë me organizatorët e DBR-së së Brazilit
Sot paradite Papa Françesku priti në Vatikan grupin e organizatorëve të DBR-së së
Rio de Zhaneiros, të cilët gjenden në Romë bashkë me Kardinalin Orani Tempesta. Në
fillim të fjalës përshëndetëse, Ati i Shenjtë u tha miqve nga brazili këtë “të fshehtë”:
“Kur mbërrita në brazil, në fjalimin tim të parë zyrtar, thashë se dëshiroja të hyja
përmes portës së zemrës së pamasë të brazilianëve, duke kërkuar leje për të trokitur
me delikatesë në dyert e tyre, për të kaluar një javë me popullin brazilian. Por,
në fund të asaj jave, duke u kthyer për Romë, vura re se kariokat (brazilianët) janë
‘vjedhës’! Po, ‘vjedhës’, se ma vodhën zemrën! Përfitoj nga prania juaj sot këtu,
për t’ju falënderuar për këtë ‘vjedhje’” – vijoi Papa. Ati i Shenjtë tha më tej
se secili prej të pranishmëve përfaqësonte laikët, rregultarët, rregulltaret, meshtarët
dhe ipeshkvinjtë, që dhanë ndihmën e tyre për organizimin e DBR-së. Organizimi i një
ngjarjeje të tillë nuk ka qenë i lehtë, janë dashur shumë punë e flijime, madje nganjëherë
ndoshta është dukur se forcat nuk do të mjaftonin, por, në raste të tilla, vihet re
edhe ndihma e Hyjit, i cili bën mrekulli, si në tregimin Ungjillor të shumimit të
bukëve. Edhe organizimi i DBR-së së Brazilit, tha Ati i Shenjtë, qe një mrekulli.
Tani duhet të kujtojmë e të zbatojmë mesazhin e tyre përfundimtar, që mund të shprehet
me tri fjalë: shkoni, pa frikë, për të shërbyer. Papa u kujtoi të pranshmëve Apostullin
e Brazilit, Hoze de Ankieta, emri i të cilit, u shkrua në librin e shenjtorëve para
pak ditësh, dhe shprehu urimin që, me ndërmjetësimin e tij populli brazilian ta mbajë
të gjallë në zemër thirrjen për t’iu përgjigjur dashurisë për Krishtin dhe për Kishën.