Ipeshkvinjtë e Tanzanisë, takojnë Atin e Shenjtë, në vizitë Ad Limina Apostolorum
Papa Françesku priti sot paradite ipeshkvinjtë e Tanzanisë, të cilët gjatë këtyre
ditëve gjenden në Vatikan për vizitën Ad Limina Apostolorum. Në fjalën përshëndetëse,
Ati i Shenjtë u tha ipeshkvinjve afrikanë se Zoti e ka bekuar Kishën në Tanzani me
shumë dhurata, për të cilat duhet të jemi mirënjohës. Dhurata e parë është ajo “historisë
mbresëlënëse të punës misionare në atë rajon”. Por misioni nuk është vetëm vepër
e së shkuarës. Kisha e Tanzanisë, “duke ndërtuar mbi zellin dhe flijimet e ungjillëzuesve
të parë, duhe ta mbajë gjithmonë parasysh thirrjen misionare dhe duhet të kujdeset
për të, në mënyrë që Ungjilli të depërtojë gjithnjë e më thellë” “dhe t’i mbushë me
dritë të gjithë përmasat e shoqërisë tanzaneze”. Papa përmendi angazhimin e Kishës
në fushën e veprave të dashurisë, sidomos kudjesin për të varfrit dhe të sëmurët,
si dëshmi e dashurisë shpëtimtare të Jezu Krishtit për të gjithë njerëzimin. Ndër
këto vepra, veçoi kujdesin shëndetësor për të sëmurët me HIV/AIDS dhe angazhimin baritor
për edukimin e popullsisë në rrafshin e përgjegjësisë dhe pastërtisë seksuale. Papa
i siguroi ipeshkvinjtë e shtetit afrikan për mirënjohjen e tij ndaj meshtarëve të
dioqezave të Tanzanisë dhe foli për rëndësinë e rolit të tyre në jetën e Kishës. Për
sa i përket rëndësisë së laikëve në veprën e ungjillëzimit, Ati i Shenjtë u tha barinjve
afrikanë: “roli i domosdoshëm i laikëve në vendin tuaj u pa qartë gjatë dy ngjarjeve
të vona kishtare: Kongresi Eukaristik Kombëtar i 2012 dhe Seminari me rastin e mbylljes
së Vitit të Fesë”. Nuk mungoi, në fjalën e Papës Françesku, vëmendja ndaj familjes:
“Dashuria e Kishës dhe kujdesi baritor ndaj familjes është zemra e ungjillëzimit të
ri”, prandaj, “duke mbështetur lutjen, besnikërinë bashkëshortore, monogaminë, pastërtinë
dhe shërbimin e përvuajtur për njëri-tjetrin brenda familjes, Kisha i jep edhe një
ndihmesë të paçmueshme shoqërisë së Tanzanisë dhe mirëqenies së saj”. Në përfundim,
Papa i ftoi barinjtë afrikanë t’i inkurajojnë të rinjtë e dioqezave të tyre të jetojnë
me virtyt dhe t’i përballojnë me urti, guxim dhe bujari sfidat e së ardhmes, si edhe
u shprehu vetë ipeshkvinjve mirënjohjen për angazhimin e tyre në të mirë të faljes,
pajtimit dhe dialogut në vend.