Françesku të rinjve fiamingë: Dëshmitarët e Krishtit janë të përvuajtur, jo triumfalistë
Është bërë e njohur në mbarë botën, tashmë, intervista dhënë nga Papa disa të rinjve
belgë, më 31 marsin e kaluar, në Vatikan. Pjesët e saj kryesore u transmetuan të enjten
e kaluar nga Tv publik fiaming i Belgjikës VRT Dje intervista u transmetua e plotë.
Po ju njohim, prandaj, me pjesët e pabotuara të enjten e kaluar.
Të varfërit
janë flamur i Ungjillit, jo i komunizmit: kjo ishte një nga shprehjet e Papës, ritheksuar
nga mjetet ndërkombëtare të informacionit masiv. Në reflektimin, të cilin tani mund
ta lexojmë të plotë, Papa Françesku flet edhe për një varfëri tjetër. Në Ungjill
lexojmë se Jezusi kishte dashuri të veçantë për njerëzit e përjashtuar nga radhët
e shoqërisë: “Të gërbulurit, vejushat, jetimët, të verbërit...njerëzit e
përjashtuar. E edhe për mëkatarët e mëdhenj... e kjo më ngushëllon! Po, sepse Ai nuk
trembet as nga mëkati. Kur gjeti ndonjë njeri, si Zakeu, që ishte hajdut, ose si Mateu,
që kishte tradhtuar atdheun, duke u shitur për para, Ai nuk u tremb fare! I pa e i
zgjodhi! Edhe kjo është varfëri: varfëria e mëkatit”. Duke iu përgjigjur
një pyetjeje tjetër, Papa pohoi se e gjen Zotin sidomos ndërmjet të sëmurëve: por
edhe në leximin e Biblës, në kremtimin e Sakramenteve, në punën e përditshme e, doemos,
në lutje. “Po si i lutet Zotit, Papa?”: “E lë të më shikojë. Dhe e
ndjej, e nuk është sentimenatalizëm. I ndjej fort gjërat, që më thotë Zoti. Nganjëherë
nuk më flet…asnjë fjalë, zbraztësi, zbrastësi, zbraztësi… po unë vijoj të jem aty,
me duresë, e kështu lutem…Rri ulur, lutem ulur, sepse më bën keq të gjunjëzohem. Nganjëherë
dremis në lutje…Lutem edhe si flet biri me Atin, e kjo ka rëndësi: e ndjej veten bir
me Atin”. Në fund, një pyetje për mënyrën e kumtimit të Ungjillit në shoqërinë
e sotme: “Rruga më e mirë është dëshmia, por e përvuajtur: ‘Unë jam
kështu, me përvujtëri, pa triumfalizëm’. Ky është një mëkat tjetër yni. Sjellje tjetër
e keqe, triumfalizmi. Jezusi nuk ishte triumfalist. Edhe historia na mëson se nuk
duhet të jemi triumfalistë, sepse të gjithë triumfalistët e mëdhenj në fund pësuan
disfatë. Dëshmia, ky është kyçi, kjo na kërkohet. Unë e jap atë me përvuajtëri, pa
bërë prozelitizëm. E kjo nuk tremb. Nuk po shkon në kryqëzatë!”.