Հայաստանի Հանրապետութեան նախագահ Սերժ Սարգսեան երէկ ընդունեց կառավարութեան հրաժարականը:
«Առաջնորդուելով Հայաստանի Հանրապետութեան սահմանադրութեան 55-րդ յօդուածի 4-րդ կէտով
եւ հիմնուելով Հայաստանի Հանրապետութեան վարչապետ Տիգրան Սարգսեանի ներկայացուցած հրաժարականին
վրայ` կ՛որոշեմ ընդունիլ կառավարութեան հրաժարականը», ըսուած է պաշտօնական հաղորդագրութեան
մը մէջ: Ըստ նախագահի հրամանագիրին, կառավարութեան անդամները պէտք է շարունակեն պարտականութիւններու
կատարումը մինչեւ նոր կառավարութեան կազմութիւնը: Ուրաբթ առաւօտեան Կեդրոնական դրամատան
մէջ տեղի ունեցած խորհրդակցութեան ժամանակ, Հանրապետութեան նախագահը ընդգծեց, որ նոր
կառավարութիւնը պէտք է յաջողի ապահովել տնտեսական աճ, բարեփոխումներու շարունակականութիւն
եւ նոր կառավարութիւնը պէտք է յաջողի վերականգնել մեր քաղաքացիներուն վստահութիւնը բարեփոխումներուն
եւ իր գործունէութեան նկատմամբ: Նախագահ Սարգսեան հաւաստիացուց, որ կառավարութեան մէջ
էական փոփոխութիւններ պիտի կատարուին եւ անհրաժեշտութիւն կայ, որպէսզի նոր աչքով նայուի
եղած խնդիրներուն, մարզերուն: Նախագահ Սարգսեան անգամ մը եւս շեշտեց, որ վարչապետի
հրաժարականը պարզապէս հրաժարական էր, այլ ոչ թէ` պարտադրանք: Ան նշեց, որ 6 տարին երկար
ժամանակահատուած է վարչապետի մը համար` տրուած ըլլալով, որ բաւական ծանր աշխատանք է:
Ան յոյս յայտնեց, որ քսան տարի ետք արդէն աւելի դիւրին պիտի ըլլայ շատ աշխատանքներ կատարելը: