Прапаведнік Папскага дома: скарыстацца магчымасцю сяброўства з Езусам
Аб Езусе “сапраўдным
Богу і сапраўдным чалавеку ў адной асобе” казаў 4 красавіка 2014 г. прапаведнік Папскага
дома айцец Раньера Канталамеса ў сваім чацвёртым велікапостным казанні для Святога
Айца і супрацоўнікаў Рымскай курыі. Абапіраючыся на навучанне св. Льва Вялікага, ён
падкрэсліў, што неабходна перайсці да яснага ўсведамлення таго, што Езус, гэта асоба,
“якая жыве і стаіць перада мной”. На думку прапаведніка, сёння для большасці вернікаў
Збаўца з’яўляцца не больш чым аб’ектам дыскусій, успамінам з мінулага, наборам догмаў
ці ерытычных поглядаў, у лепшым выпадку тым, хто узнёсся на Неба і вернецца напрыканцы
часоў. Але гэта памылковы погляд – Езус з’яўляецца сябрам, які ўваскрос і жыве, і
з Ім трэба мець адпаведныя адносіны.
Айцец Канталамеса заўважыў, што Езусу,
“сапраўднаму чалавеку”, было ўласціва адно з самых шляхетных чалавечых пачуццяў –
сяброўства. Ён, калі вёў зямное жыццё, нягледзячы на тое, што любіў усіх, меў сяброўскія
адносіны толькі з некаторымі людзьмі, напрыклад з Лазарам і яго сёстрамі ці св. Янам.
Сёння аднак, пасля ўваскрасення, Ён больш не абмежаваны целам і таму дае магчымасць
кожнаму чалавеку пасябраваць з сабой, у поўным сэнсе гэтага слова. Айцец Канталамеса
пажадаў, каб Святы Дух дапамог вернікам з радасцю скарыстацца гэтай цудоўнай магчымасцю,
якая робіць жыццё поўным.