Në Engjëllin e Tënzot të së dielës, Papa do t’u dhurojë besimtarëve mijëra Ungjij
Mijëra Ungjij, në format xhepi: kjo është dhurata e Papës Françesku për besimtarët,
që do të mblidhen në Sheshin e Shën Pjetrit të dielën e ardhshme. Është mesazh, që
ta kenë gjithnjë me vete Ungjillin e ta rimarrin shpesh në dorë për ta lexuar e për
t’i medituar fjalët dhe veprimet e Jezusit. Vëllimi i vogël format xhepi, i shtypur
nga Tipografia e Vatikanit (në një edicion të veçantë, që nuk është në shitje), që
përmban katër Ungjijtë dhe Veprat e Apostujve, hapet me një citim të Papës Françesku
nga Thirrja Apostolike “Evangelii Gaudium”: “Gëzimi i Ungjillit e mbush plot zemrën
dhe mbarë jetën e atyre, që takohen me Jezusin”. Në faqen e brendshme të kapakut,
mund të lexohen udhëzimet për të thënë Rruzaren e Mëshirës Hyjnore. Faqja e tretë
e kapakut mbyllet me lutjen e të Lumit kardinal Njumën: “I dashur Jezus”, që i pëlqente
aq shumë Nënë Terezës, prandaj ua kujtonte gjithnjë motrave të saj, duke i porositur
ta thoshin çdo ditë. Ja edhe lutja e Kardinalit John Newman
“Një
dritë në errësirë”. Jezus i dashur, ndihmomë ta përhap aromën Tënde, kudo që
shkoj, përmbytma shpirtin me Shpirtin tënd, me jetën tënde. Depërto në shpirtin
tim e pushtoje krejtësisht, aq sa jeta ime të jetë veç pasqyrim i jetës sate. Shndrit
në mua, aq i pranishëm në zemrën time sa çdo shpirt, që takoj, ta ndjejë këtë
prani në shpirtin tim. Kur të m’i ngulin sytë, të mos më shohin mua, por vetëm
Ty, o Jezus! Rri me mua, e unë do të shndris si Ti: do të shndrisim së bashku
botën, si dritë për të gjithë. Drita, o Jezus, do të dalë prej Teje, e asnjë
rreze, e imja nuk do të jetë... Ti do të ndriçosh mbi të tjerët, përmes meje. Ma
jep hirin të lutem, ashtu si Ty të pëlqen t’i ndris me dritën tënde, ata që më
rrethojnë. Bëj që të kumtoj pa kurrfarë predikimi me shembull, Jezus, e jo me
fjalë: me forcën, që tërheq, ndikimin plot mirësi, me begatinë pafund të
dashurisë sate, që më zjen në zemër e në shpirt.