Օթիզմի իրազեկման Համաշխարհային Օրուան առիթով քայլարշաւ Երեւանի մէջ։
ԵՐԵՒԱՆ, «Արմէնփրէս».– Օ-թիզմ ունեցող աւելի քան 100 երեխաներ եւ անոնց ծնողներ, ներառական
եւ հանրակրթական դպրոցներու աշակերտներ եւ ուսուցիչներ, ինչպէս նաեւ յատուկ մասնագիտական
կրթօճախներու աշխատակիցներ եւ արտերկրէն ժամանած հիւրեր մասնակցեցան 2 Ապրիլին Երեւանի
մէջ կազմակերպուած օթիզմի իրազեկման համաշխարհային օրուան նուիրուած քայլարշաւին, որ
տեղի ունեցաւ առաջին տիկին Ռիտա Սարգսեանի գլխաւորութեամբ, Երեւանի քաղաքապետարանի եւ
ՄԱԿի մանկական հիմնադրամի աջակցութեամբ: Երթը սկսաւ քաղաքապետարանէն եւ հասաւ մինչեւ
Ազատութեան հրապարակ, ուր տեղի ունեցաւ օթիզմէ տառապող երեխաներուն նուիրուած «Աստծոյ
հրեշտակներ» երգի շնորհահանդէսը եւ «Երեխաների զարգացման միջազգային կենտրոն»ի սաներու
նկարներու բացօթեայ ցուցահանդէսը, որուն ներկայ եղաւ նաեւ Հայաստանի առաջին տիկին Ռիտա
Սարգսեանը:Երգին երաժշտութիւնը կը պատկանի Ռիտա Սարգսեանի, խօսքերը՝ Աւետ Բարսեղեանի: Երգը կատարեցին Ինգա եւ Անոյշ Արշակեանները, «Վաղորդեան կաթիլներ» համոյթը, Չայկովսկիի անուան երաժշտական մասնագիտական դպրոցի մանկական նուագախումբն ու երգչախումբը:
«Աուտիկ երեխաները կոչւում են Աստծոյ հրեշտակներ. աուտիզմը հիւանդութիւն չէ, այլ կենսակերպ է։ Եթէ այդքանը հասկանալով ջարդենք այն պատը, որ մեզ այդ երեխաներից տարանջատում է, նրանք անպայման կը գտնեն իրենց տեղը մեր հասարակութեան մէջ: Ես փորձել եմ այս երեխաների երաժշտական կերպարը գտնել, Աւետը՝ հոգու կերպարը», իր խօսքին մէջ ըսաւ առաջին տիկինը:
«Աուտիզմ ազգային հիմնադրամ»ի տնօրէն Լիլիթ Աթաջանեան ըսաւ. «Մենք միանում ենք աշխարհին այս ակցիայով, եւ ամէն տարի տարբեր միջոցառումներ ենք կազմակերպել չկրկնուելու համար: Նախորդ տարի գիտաժողով էին նախաձեռնել, մէկ այլ տարի ցուցահանդէս հէնց ՄԱԿի գրասենեակում: Այս տարուայ տարբերութիւնն այն է, որ երթ ենք կազմակերպել Երեւանի քաղաքապետարանի մօտից. խորհրդանշական վայր է, քանի որ քաղաքապետարանը մեզ դպրոցի շէնք յատկացրեց այս տարի եւ կաթսայատօն կառուցուեց դպրոցի համար»։
Քայլարշաւի մասնակիցները կը կրէին օթիզմի մասին բարձրաձայնող խորհրդանշական պաստառներ, շապիկներ եւ կապոյտ փուչիկներ:
| All the contents on this site are copyrighted ©. |