Մարոնի համայնքի Պշարա Ռայի պատրիարքը չորեքշաբթի, 2 ապրիլին, Պքերքէի մէջ նախագահեց
Մարոնի եպիսկոպոսներու խորհուրդի նիստին, որմէ բխած հաղորդագրութեան մէջ խորհուրդը շնորհաւորեց
Ռայի պատրիարքին ստանձնած պատրիարքութեան պաշտօնին քառամեակը, որ հարուստ էր յաջողութեամբ
ու ազգային եւ եկեղեցական նուաճումներով: Մարոնի եպիսկոպոսներու խորհուրդը ցաւակցութիւն
յայտնեց ասորի ուղղափառ եկեղեցւոյ` Զաքքա Իուաս պատրիարքին վախճանումին, ինչպէս նաեւ
շնորհաւորեց Իգնատիոս Բ. Քարիմը ասորի ուղղափառ համայնքի պատրիարք նշանակումին առիթով: Խորհուրդը
խստիւ դատապարտեց Աթալլա եպիսկոպոսը առեւանգելու փորձը եւ կոչ ուղղեց կառավարութեան,
բանակին եւ ապահովութեան ուժերուն այդ երեւոյթները կասեցնող համապատասխան քայլերու դիմելու: Մարոնի
եպիսկոպոսները հանգստութիւն յայտնեցին Թրիփոլիի մէջ ապահովական ծրագիրին գործադրութեան
առիթով եւ մաղթեցին, որ նման ծրագիրներ կը գործադրուին երկրին տագնապալի բոլոր անկիւններուն
մէջ: Այս շրջագիծին մէջ, խորհուրդը քաղաքական անձնաւորութիւններէն պահանջեց զօրակցիլ
բանակին ու ապահովութեան ուժերուն: «Լիբանանը արտաքին տագնապներուն եւ բախումներուն
մէջ ներքաշելու կեցուածքը եւ այլոց խնդիրները Լիբանան փոխադրելու քայլերը պատճառ կը հանդիսանան
տարիներ շարունակ տեւած համերաշխութիւնը թիրախ դարձնելուն», նշեց խորհուրդը: Մարոնի
եպիսկոպոսներու խորհուրդը շնորհակալութիւն յայտնեց Մաալուլայի մայրապետներուն ազատ արձակումին
համար ի գործ դրուած ջանքերուն համար, ինչպէս նաեւ քաջալերեց Հալէպի մէջ առեւանգուած
առաջնորդներուն ազատ արձակումին համար թափուած ճիգերը: «Կը մաղթենք, որ այդ ջանքերը
կը հասնին նաեւ Սուրիոյ բանտերուն մէջ գտնուող լիբանանցիներուն ազատ արձակումին եւ կը
ցաւինք Սուրիոյ մէջ գտնուող աղօթատեղիներու սրբապղծումին», հաստատեց խորհուրդը: Մարոնի
եպիսկոպոսներու խորհուրդը անհրաժեշտ նկատեց սահմանադրութեամբ ճշդուած ժամկէտին ընթացքին
հանրապետութեան նախագահին ընտրութիւնը: