Papa: për të bërë paqe në familje, nuk duhet ndërhyrja e Kombeve të Bashkuara; mjafton
të lutesh e të duash
“Martesa është ikonë e dashurisë së Hyjit”. Këtë pohoi Papa në audiencën e sotme të
përgjithshme, kushtuar Sakramentit të martesës. Ati i Shenjtë nënvizoi me forcë rëndësinë
e lutjes në familje. Lidhja me Zotin, pohoi, ndihmon për kapërcimin e konflikteve,
që lindin ndërmjet bashkëshortëve. Në çastin e përshëndetjeve, një mendim i posaçëm
drejtuar punëtorëve të Alkoas dhe banorëve të Akuilës, 5 vjet pas tërmetit, që rrënoi
gjithë qytetin.
“Burri do
ta lërë t’atin e t’ëmën e do të jetojë bashkë me gruan e vet e do të bëhen një trup
i vetëm”. Papa e shtjelloi katekizmin, duke u nisur pikërisht nga ky fragment i Librit
të Zanafillës, për të nënvizuar, më pas, se Besëlidhja e Hyjit me ne pasqyrohet në
këtë besë, lidhur ndërmjet burrit e gruas: “Kur burri e gruaja kremtojnë Sakramentin
e martesës, mund të themi se vetë Hyji pasqyrohet në ta: vulos mbi ta tiparet dhe
natyrën e pashlyeshme të dashurisë së tij. Martesa është ikona e dashurisë së Zotit
me ne. Shumë bukur! Edhe Hyji, në të vërtetë, është bashkim”. Pikërisht ky,
shtoi Ati i Shenjtë, është misteri i martesës: dashuria e Zotit, që pasqyrohet në
martesë, në çiftin, i cili vendos të jetojë bashkë. Kisha, shtoi, është Nusja e Krishtit,
e kjo tregon se martesa i përgjigjet një thirrjeje të posaçme e duhet parë si shugurim.
Bashkëshortët, shtoi Ati i Shenjtë, ngarkohen me një mision të mirëfilltë. Me misionin
ta bëjnë të dukshëm, duke u nisur nga gjërat më të thjeshta, më të zakonshme, dashurinë
me të cilën Krishti e do Kishën e vet. E dimë mirë, pohoi Papa në vijim, sa vështirësi
e prova kalojnë bashkëshortët gjatë jetës. Prandaj ka shumë rëndësi të mbahet e gjallë
lidhja me Hyjin, që është në bazë të lidhjes martesore: “Lidhja e vërtetë, është
gjithnjë me Zotin. Kur familja lutet, lidhja nuk këputet. Kur dhëndri lutet për nusen
e nusja për dhëndrin, kjo lidhje bëhet tejet e fortë. Njëri lutet për tjetrin”. Është
e vërtetë, tha Papa, se në jetën martesore ka edhe çaste të vështira, grindje, sherre.
Madje nganjëherë ndodh edhe që të fluturojnë pjatat, por kjo nuk duhet të ngjallë
trishtim: “Kështu është jeta njerëzore. Por dashuria është më e fortë se sherri.
E ky, edhe sekreti. Prandaj i këshilloj bashkëshortët, të mos e përfundojnë ditën
e kaluar me zënka, pa bërë paqe. Gjithnjë! E për të bërë paqe, nuk është nevoja të
thirren Kombet e Bashkuara, që të vijnë në shtëpi e të vendosin paqen. Mjafton një
ledhatim i lehtë, një përshëndetje e vogël, një mirupafshim nesër. E nesërmja, pastaj,
sjell të renë. Kjo është jeta: duhet çuar përpara kështu, me guxim, me dëshirën për
të jetuar së bashku”. Më pas Papa rikujtoi tri fjalët themelore, gati-gati
magjike, që i ndihmojnë bashkëshortët ta duan me gjithë zemër njëri-tjetrin: “Me leje,
më fal, faleminderit!”: “T’i përsërisim të gjithë! Me leje, faleminderit e më
fal. Me këto tri fjalë, me lutjen për njëri tjetrin e me paqen pa rënë muzgu, martesa
shkon përpara. Tri fjalët magjike, lutja e paqja, gjithnjë!”. Papa foli përsëri
për familjen edhe në përshëndetjet drejtuar shtegtarëve, ardhur nga të katër anët
e botës. Françesku nënvizoi posaçërisht sa e rëndësishme është të lutemi për familjet,
që kalojnë çaste të vështira, duke theksuar se ata janë dhuratë e Zotit në bashkësitë
tona. Në Ditën Botërore të Autizmit, në përfundim të audiencës së përgjithshme,
tre të rinj austikë të Fondacionit “Përtej labirintit Onlus” i dorëzuan Papës një
model të personalizuar të “Hugbike”, biçikletë e veçantë, sepse e realizuar nga vetë
të rinjtë austikë, të cilët e quajtën “biçikleta e përqafimeve”. E kjo, sepse në këtë
biçikletë drejtuesi e rrok njeriun e ulur përpara, duke e bërë ecjen më të sigurt.
Tepër emocinues, çasti kur të rinjtë, të shoqëruar nga familjarët, ia dorëzuan biçikletën
Papës, i cili u shprehu mirënjohjen për këtë gjest kaq prekës.