Святы Айцец заклікаў католікаў і мусульман працаваць разам на карысць міру
Інтэгральнае развіццё
асобы і грамадства патрабуе, каб хрысціяне і паслядоўнікі ісламу былі ў стане “працаваць
разам на карысць міру і агульнага дабра”, лічыць папа Францішак. Ён скіраваў зварот
на восьмую ісламска-хрысціянскую малітоўную сустрэчу, якая прайшла 25 сакавіка 2014
г. у ліванскім Ямхуры. У Ліване ўрачыстасць Звеставання Пана ўжо чацвёрты год з’яўляецца
нацыянальным святам. У тэлеграме за подпісам кардынала Дзяржсакратара Пьетра Параліна
Святы Айцец заклікаў хрысціян і мусульман працаваць разам для інтэгральнага развіцця
народа і будавання грамадства.
Як падкрэсліў айцец Мігель Анхель Аюса Гіксот,
сакратар Папскай рады па міжрэлігійным дыялогу і віцэ-прэфект Камісіі па рэлігійных
сувязях з мусульманамі, падчас малітоўнай сустрэчы ў Ліване: дыялог з’яўляецца двухбаковай
камунікацыяй, якая звязана з уменнем гаварыць і слухаць, дарыць і атрымліваць, жаданнем
духоўна ўзаемаабагачацца. Дыялог, паводле яго, заснаваны на вызнаванні сваёй веры
і адкрытасці на рэлігію іншага чалавека, і гэта не мае нічога супольнага са “здрадай
місіі Касцёла” або “новым метадам навяртання на хрысціянства. Міжканфесійны дыялог
засноўваецца на чатырох кітах: жыцці, працы, тэалагічным абмене і рэлігійным досведзе.
Спасылаючыся на папу Францішка, айцец Аюса падкрэсліў агульную пабожнасць
хрысціян і мусульман, звязаную з Дзевай Марыяй, якая “некалькі разоў згадваецца ў
Каране”. Паводле сакратара Папскай рады, Яна з’яўляецца мадэллю дыялогу, таму што
вучыць нас верыць не з самаўпэўненасцю, але адкрытасцю на іншых. І такая пабожнасць,
адзначыў святар, стварае “сяброўскія пачуцці” і “заахвочвае да супрацоўніцтва і салідарнасці”
паміж дзвюма супольнасцямі, “як дзецьмі аднаго Бога, што належаць да адной чалавечай
сям’і”.