Sot, në selinë e Këshillit Papnor për Laikët, sekretari i dikasterit, imzot Josef
Clemens, u dorëzoi anëtarëve të Legjionit të Marisë, dekratin me të cilin organizata
e tyre njihet si shoqatë ndërkombëtare besimtarësh dhe i miratohen statutet. Lindur
në vitin 1921 në Dublin të Irlandës, më nismën e një grupi të vogël njerëzish, udhëhequr
nga Frank Duff, funksionar i Ministrisë së Financave dhe më pas, sekretar privat e
Ministrit irlandez të Mbrojtjes, kjo shoqatë historike është përhapur në të gjithë
botën, gjatë 93 vjetëve të jetës. Ka ardhur edhe në Shqipëri, pas komunizmit. Udhëheqësi
shpirtëror i anëtarëve të kësaj shoqate në Tiranë është don Henricus B.M. Veldkamp. Përmes
formimit të mijëra grupeve në të gjitha kontinentet, Legjioni i Marisë, i rrënjosur
fuqimisht në përshpirtërinë mariane e në besimin ndaj Shpirtit Shenjt, u propozon
anëtarëve udhën e shenjtërimit të jetës, përmes shërbimit ndaj nevojtarëve, sidomos
ndaj atyre, që nuk e njohin fenë, ose qëndrojnë larg saj. Siç nënvizoi imzot
Clemens, pas dorëzimit të dekretit, “Legio Marie” është bërë shenjë e prekshme zellit
misionar të laikëve, i cili, i jetuar së bashku me impenjimet e përditshme në familje
e në punë, i shërben thirrjes për shenjtërimin e jetës, marrë me Pagëzimin.