Մարդկային Իրաւանց Եւրոպական դատարանը Օճալանի ցկեանս բանտարկութիւնը «Մարդկային Իրաւանց
խախտում» կը նկատէ
Մարդկային իրաւանց եւրոպական դատարանը ՔԱԿ-ի բանտարկուած ղեկավար Ապտիւլլա Օճալանի բողոքին
հիմամբ վճռեց, որ Թուրքիա մասամբ խախտած է Մարդկային իրաւանց շուրջ եւրոպական ուխտը:
Դատարանը մասնաւորաբար Անգարային կոչ ուղղեց պայմանաւորեալ ազատ արձակման մեքանիզմներ
ստեղծելու կամ ցկեանս բանտարկութիւնը ջնջելու: Օճալան Իմրալը բանտին մէջ տիրող իր
բանտային պայմաններուն շուրջ բողոք ներկայացուցած էր Մարդկային իրաւանց եւրոպական դատարանին: 7
դատաւորներէն չորսը վճռեցին, որ 17 փետրուար 2009-էն ի վեր Օճալանի արգելափակման պայմանները
Մարդկային իրաւանց եւրոպական ուխտի` անմարդկային կամ նուաստացնող վերաբերմունքը արգիլող
3-րդ յօդուածի խախտում են: Օճալան փետրուար 1999-էն նոյեմբեր 2009 մեկուսացուած էր: Դատաւորներէն
վեցը վճռեցին, որ 17 նոյեմբեր 2009-էն ետք 3-րդ յօդուածի խախտում տեղի չէ ունեցած: Դատարանը
նաեւ միաձայնութեամբ վճռեց, որ Օճալանի ցկեանս բանտարկութիւնը 3-րդ յօդուածի խախտում
մըն է, սակայն 4 դէմ եւ 3 թեր քուէներով վճռեց, որ սեփական եւ ընտանեկան կեանքը յարգելու
իրաւունքին վերաբերող 8-րդ յօդուածի խախտում գոյութիւն չունի: Դատարանը նաեւ զգուշացուց
Անգարան, որ «բանտերը պէտք չէ դժոխքի դարպասներու վերածուին»: