Папа заклікаў мафіёзі пакаяцца і спыніцца рабіць зло
“Я прашу вас змяніць
сваё жыццё, пакаяцца і спыніцца рабіць зло”, - звярнуўся 21 сакавіка 2014 г. увечары
папа Францішак да людзей, звязаных з мафіяй і злачыннымі справамі. У суседняй з Ватыканам
парафіі св. Грыгорыя VII Пантыфік прыняў удзел у малітоўным чуванні ў дзень памяці
аб ахвярах мафіі. Святога Айца прывітаў мясцовы пробашч, айцец Паола Маела. Затым
сваячка адной з больш чым 900 ахвяр гэтай злачыннай арганізацыі выказала надзею, што
барацьба з мафіяй і карупцыяй можа быць эфектыўнай і сітуацыя можа змяніцца. Пантыфік
падзякаваў за прадстаўленую магчымасць прыняць удзел у малітоўнай сустрэчы. Ён выказаў
надзею, што пачуццё адказнасці возьме верх над карупцыяй, каб вылечыць сацыяльныя
паводзіны і адносіны. Ён адзначыў, што справядлівасць нараджаецца з сэрца і засведчыў
сваю поўную салідарнасць з удзельнікамі чування.
Папа звярнуўся да мафіёзі
з асабістым заклікам. “Змяніце сваё жыццё, пакайцеся, спыніцеся рабіць зло, мы молімся
за вас. Я прашу вас аб гэтым на каленях, гэта для вашай жа карысці, бо жыццё, якое
вы зараз вядзеце, не дасць вам задавальненне, радасці, шчасця. Улада, грошы, што ў
вас ёсць сёння, так шмат брудных спраў і злачынстваў мафіі, грошы і ўлада, заплямленыя
крывёй – вы не возьмеце гэтага ў вечнае жыццё. Пакайцеся, пакуль яшчэ ёсць час, каб
не апынуцца ў пекле, што вас чакае, калі вы будзеце жыць гэтак далей. Вы мелі маму
і тату, падумйце пра іх і заплачце!”, - сказаў папа Францішак.
Святому Айцу
перадалі белую стулу – частку літургічнай вопраткі святара – якую выкарыстоўваў кс.
Джузэпэ Дыяна, забіты мафіяй роўна 20 гадоў таму. Папа ўсклаў яе на сябе, пасля чаго
ўдзяліў усім апостальскае благаслаўленне. Пасля набажэнства Пантыфік коратка размаўляў
з некалькімі прысутнымі на ім святарамі і свецкімі, сваякамі ахвяраў мафіі.