Францішак: не выкарыстоўваць Божае слова для сваіх інтарэсаў
Каб не забіць Божае
слова ў сэрцы, трэба быць пакорнымі і здольнымі маліцца, перакананы папа Францішак.
21 сакавіка 2014 г. падчас ранішняй Эўхарыстыі ў Доме св. Марты, Пантыфік заклікаў
не паддавацца спакусе “прысваення” Божага слова і выкарыстання яго толькі для свайго
задавальнення і выгады. Папа пракаментаваў евангельскую прыпавець пра вінаградараў,
якія, каб авалодаць вінаграднікам забілі напачатку слугаў, а затым і гаспадарскага
сына. Слухачамі гэтай гісторыі былі фарысеі і кніжнікі, падкрэсліў Папа і дадаў, што
прыпавесць павінна была нагадаць, што здараецца, калі сэрца становіцца закрытым на
Божае слова. “Гэта драма гэтага народа і наша драма. Яны прысвоілі сабе Божае слова.
Слова Божае стала іхнім – словам паводле іх інтарэсаў, іх ідэалогій, іх тэалогій,
на службе ім. І кожны яго інтэрпрытаваў паводле свайго жадання і выгады. У гэтым драма
гэтага народа. І каб захаваць такі стан рэчаў, яны забівалі. Так зрабілі і з Езусам”,
- сказаў Папа.
На думку Святога Айца фарысеі зразумелі, што ў прыпавесці Езус
казаў пра іх і таму жадалі забіць Яго. Слова Божае “станавілася памерлым, зняволеным,
Святы Дух быў закрыты ў жаданнях кожнага з іх”. І менавіта так здараецца з намі, калі
не адкрываемся на навізну Божага Слова, становімся непаслухмянымі яму.
Францішак
падкрэсліў, што слова Пана не ўваходзіла ў сэрцы фарысеяў, але сялілася ў простых
людзях, якія слухалі Хрыста і бачылі ў ім прарока. Яны не выкарыстоўвалі слова Божае
для сваёй выгады, але слухаючы яго намагаліся станавіцца хоць крыху лепшымі. Каб не
станавіцца падобнымі на фарысеяў, Папа параіў вернікам браць прыклад з простых людзей:
быць пакорнымі і маліцца.