Кардынал: Ян Павел ІІ пакінуў найбольшы ўклад у навучанне аб сям’і
Ян Павел ІІ пакінуў
у спадчыну Касцёлу 134 катэхезы прысвечаныя сужэнскай любові, не кажучы пра асобныя
дакументы ці іншыя прамовы. Акрамя яго ні адзін Папа ў гісторыі не надаваў гэтай тэме
столькі ўвагі, лічыць кардынал Карла Кафара, арцыбіскуп Балонскі і першы кіраўнік
Папскага інстытута па вывучэнні сужэнства і сям’і, які носіць імя благаслаўлёнага
Пантыфіка і быў заснаваны ім у 1981 г. 20-21 сакавіка 2014 г. у гэтай навучальнай
установе праходзіць міжнародная канферэнцыя “Ян Павел ІІ – Папа сям’і”, падчас якой
даследчыкі і эксперты з розных краін свету абменьваюцца поглядамі на душпастрыства
сем’яў у святле навучання Пантыфіка, які будзе хутка кананізаваны.
Кардынал
Кафара нагадаў, пра важнасць навучання Яна Паўла ІІ пра сям’ю, сужэнства і любоў паміж
мужчынам і жанчынай. Папа называў сужэнства “сакрамэнтам адкуплення”, адзначыў пурпурат
і дадаў, што для гэтага існуюць дзве галоўныя прычыны. Па-першае, таму што сужэнства
перашкаджае абмежаванню чалавечай любові толькі адным вымярэннем, паніжаючы рызыку
выкарыстання іншага чалавека ў якасці аб’екта; а па-другое, таму што сужэнская любоў
нясе ў сабе жаданне бясконцасці і вечнасці. Сакрамэнт сужэнства адкупляючы, таму што
робіць мужчыну і жанчыну здольнымі любіць адно аднаго да канца, лічыць ён.
Акрамя
таго, кардынал Кафара падкрэсліў, што хрысціянскае разважанне пра любоў узбагаціла
само гэта паняцце, злучыўшы ў ім разам тры элементы: любоў ў яе цялеснае форме, любоў,
як сяброўства і любоў у якасці бескарыслівага і вечнага дару з самаго сябе. “Сёння,
калі не будуць захоўвацца ўсе гэтыя тры вымярэнні, сужэнская любоў моцна збяднее”,
- перакананы італьянскі пурпурат.