Пантыфікат бл. Яна
Паўла ІІ быў адным з самых доўгіх у гісторыі Касцёла і не дзіўна, што на яго прыйшлася
вялікая колькасць інавацый. Напярэдадні кананізацыі першага Папы з Усходняй Еўропы,
якая адбудзецца 27 красавіка 2014 г., варта ўзгадаць прынамсі пра некаторыя, самыя
важныя з іх. Ян Павел ІІ здзейсніў апошнюю да сённяшняга дня паўнавартасную рэформу
Рымскай курыі, рэарганізаваўшы яе структуры ў пяць груп: Дзяржсакратарыят, Кангрэгацыі,
Касцёльныя трыбуналы, Папскія рады і аддзелы Рымскай курыі. Менавіта Ян Павел ІІ стварыў
новыя ватыканскія дыкастэрыі: па справах сям’і, культуры, душпастырства работнікаў
сферы аховы здароўя, Папскую акадэмію жыцця і Папскую камісію “Ecclesia Dei”. Благаслаўлёны
Папа ўнёс змены ў парадак правядзення канклаву, напрыклад, абавязаўшы кардыналаў пражываць
у гэты перыяд непасрэдна на тэрыторыі Ватыкана – у Доме св. Марты.
Ян Павел
ІІ увёў у літургічны каляндар новае свята, прысвечанае Божай Міласэрнасці, якое адзначаецца
у наступную пасля Велікадня нядзелю. Ён стаў першым Пантыфікам, які ўвайшоў у Кентэрберыйскую
катэдру – галоўны храм Англіканскай Царквы. Ён быў першым Папам, які наведаў лютэранскую
царкву, сінагогу і мячэць.
Па ініцыятыве Яна Паўла ІІ сталі адзначацца Сусветны
дзень хворага, Сусветны дзень кансэкраванага жыцця. Ён заснаваў Сусветныя дні моладзі
і заклаў традыцыю міжрэлігійнай малітвы за мір, якая ўжо чатыры разы праходзіла ў
італьянскім Асізі.
Менавіта Ян Павел ІІ быў першым Папам, які дазволіў апублікаваць
справаздачу аб эканамічнай дзейнасці Святога Пасаду, а ў гады яго пантыфікату структуры
Апостальскай Сталіцы сталі прысутнымі ў інтэрнэце, пачаў дзейнасць Ватыканскі тэлевізійны
цэнтр.