250 anëtarë të besimeve të ndryshme po dialogojnë në Kastel Gandolfo. Sot, takimi
me Papën
Takim i zhvilluar në një atmosferë thjeshtësie familjare, ky që u jetua sot, në Vatikan.
20 besimtarë, të 8 besimeve të ndryshme, u pritën nga Papa Françesku. Përfaqësonin
një grup shumë më të madh, prej 250 të krishterësh, myslimanësh, hebrenjsh, hinduistësh,
sikhsh, budistësh dhe besimtarësh të feve të tjera, pjesëmarrës në takimin “Kjara
dhe fetë. Së bashku drejt unitetit të familjes njerëzore”, që vijon qysh dje, në Kastel
Gandolfo. Papa Françesku e vlerësoi lart nismën, në kujtim të Kjara Lubih, themeluese
e “Lëvizjes së Fokolarëve”, gjashtë vjet pas vdekjes, duke theksuar se ka shumë rëndësi
të ecësh përpara, pa u ndaluar kurrë”. Të gjithëve, pastaj u drejtoi kërkesën: “Lutuni
për mua!”. Por, mbi rëndësinë e kësaj ngjarjeje origjinale, që do të përfundojë
nesër me një konferencë publike në Universitetin Papnor Urbanian, të dëgjojmë, në
mikrofonin tonë, Roberto Katalanon, drejtues i Qendrës për dialogun ndërfetar
të Fokolarëve: Përgjigje: - Një nga përkufizimet më tipike, formuluar
për Kjara Lubih, është ‘grua e dialogut’. E dialogut, që bëri, brenda Kishës katolike,
me besimtarët e bashkësive të tjera kishtare e të Kishave të tjera, me njerëz të besimeve
të tjera e edhe me persona pa orientim fetar. Ajo, personalisht, u takua me budistë,
hinduistë, hebrenj, myslimanë, sikhs e nga gjithë këto, përveç përvojës së Lëvizjes
së Fokolarëve në botë, lindi përvoja e dialogut, që ne e quajmë: “dialog i jetës”,
zhvilluar, më pas, në dialog bashkëpunimi, bashkimi përvojash e edhe në dialog akademik.
Gjithnjë dialogë dypalësh: budistë-të krishterë; hinduistë-të krishterë, hebrenj-të
krishterë, myslimanë-të krishterë. Kështu zakonisht, por këtë herë u mendua të organizohet
një dialog ndërfetar: për herë të parë, përfaqësues të dialogëve dypalësh, u mblodhën
për këtë përvojë të përbashkët dialogu. Pyetje: - Me ç’objektiv?
Përgjigje:
- Objektivi është, mbi të gjitha, të komunikojmë me njëri-tjetrin lidhur
me përvojat e njëri-tjetrit, parë si rrugë e jetuar dialogu dypalësh, duke pasur parasysh
se të gjithë impenjohemi në të njëjtin dialog, por në sektorë të ndryshëm. Prej këndej,
ideja që të bashkohemi, si në një mozaik, për të vijuar, pastaj, përpjekjen për ta
jetuar së bashku përmasën universale e për të marrë frymë në hapësirën e pakufi të
kësaj përmase.