Пантыфік запэўніў, што Святы Пасад зробіць усё для міру ва Усходняй Еўропе
Кіраўнік Украінскай
Грэка-Каталіцкай Царквы асабіста распавёў Пантыфіку пра падзеі, якія адбыліся ва Украіне
на працягу апошніх месяцаў. Як паведаміў Дэпартамент інфармацыі Украінскай Грэка-Каталіцкай
Царквы, Святы Айцец выказаў сваю салідарнасць і блізкасць да народа Украіны, у яго
пакутах і небяспецы. Асаблівую ўвагу Папа надаў тым выклікам, якія стаяць сёння перад
Украінай і Царквой. Ён запэўніў архіепіскапа, што Апостальская Сталіца зробіць усё
для таго, каб захаваць мір ва Усходняй Еўропе, не дапусціць ваеннага супрацьстаяння
і небяспекі эскалацыі насілля і кровапраліцця. Святы Айцец запэўніў, што ў апецы і
падтрымцы Украінскай Грэка-Каталіцкай Царквы з боку Святога Пасаду ніколі не будзе
недахопу. Папа Францішак прыняў архіепіскапа Святаслава Шаўчука 17 сакавіка 2014 г.
у Ватыкане.
Архіепіскап Кіева-Галіцкі ў размове з Пантыфікам падкрэсліў, што
Царква ў цяжкі час была са сваім народам, пастыры разам з вернымі перажылі ўсю драму
грамадскага супрацьстаяння і працягваюць служыць людзям у адпаведнасці з іх патрэбамі.
Асобна іерарх прааналізаваў міжканфесійныя адносіны ва Украіне і дзейнасць Усеўкраінскай
рады Цэркваў і рэлігійных арганізацый. Ён звярнуў увагу на намаганні рэлігійнага асяроддзя
па захаванні грамадзянскага міру, адзінства і згоды паміж рознымі нацыянальнымі і
рэлігійнымі супольнасцямі.
17 сакавіка Кіраўнік украінскіх грэка-католікаў
сустрэўся таксама з кардыналам Дзяржсакратаром Пьетра Паралінам.