Brenda 2020-ës, të zhduket skllavëria dhe trafiku i njerëzve. Selia e Shenjtë nënshkruan
një marrëveshje me fetë botërore
U nënshkrua dje, një marrëveshje ndërmjet feve të mëdha botërore për të çrrënjosur
format moderne të skllavërisë dhe të trafikut të njerëzve brenda vitit 2020. Quhet “Global Freedom
Network” (Rrjeti Global i Lirisë), rrjeti i katolikëve, anglikanëve, myslimanëve dhe
i Fondacionit “Walk Free” (Ec i lirë), që i ka vënë qëllim vetes të nxisë një aksion
global ndaj këtyre krimeve kundër njerëzimit, përmes “mjeteve të fesë”, si lutja,
agjërimi e bamirësia. Përfaqësuesi i Papës Françesku, imzot Sançez Sorondo, përmendi
kërkesën e Atit të Shenjtë për t’i përballuar këto tema, së bashku me tregtinë e paligjshme
të organeve njerëzore: “Të gjitha këto forma të reja skllavërie, trafiku njerëzish
e prostitucioni janë krim kundër njerëzimit. Papa Françesku e ka përsëritur këtë koncept
katër herë dhe unë e falenderoj që pati guximin për ta bërë këtë. Papa thotë: ‘Po,
unë i theksoj këto gjëra, sepse të tjerët nuk duan t’i përmendin, por janë realitet!’” Në
deklaratën e përbashkët, nënshkruesit e Rrjetit nënvizojnë se “shfrytëzimi fizik,
ekonomik dhe seksual i burrave, grave dhe fëmijëve” dënon sot me një jetë të mjeruar,
30 milion vetë. Tolerimi i kësaj gjendjeje, shtojnë më pas, do të thotë dhunim i humanitetit
të përbashkët e fyrje për ndërgjegjen e të gjithë popujve. Prandaj, së pari, duhet
luftuar indiferenca ndaj viktimave të trafikut e përmes idealeve të fesë dhe promovimit
të vlerave të njeriut, të çrrënjoset përfundimisht kjo skllavëri e ditëve tona, e
cila vazhdon të mbijetojë, pavarësisht nga përpjekjet. Të dëgjojmë të dërguarin e
kryeipeshkvit të Kanterburit, David John Moxon: “Skllavëria moderne dhe trafiku
i njerëzve është një nga shkandujt e tragjeditë më të mëdha të kohës sonë . Është
e patolerueshme që miliona vëllezër t’i nënshtrohen kësaj dhune, duke u bërë subjekt
i shfrytëzimit çnjerëzor, të privuar nga dinjiteti e të drejtat e tyre. Kjo fyerje
duhet të prekë secilin prej nesh”. Viktimat, u vu në dukje gjatë nënshkrimit
të marrëveshjes, mbahen të fshehura nëpër vende prostitucioni, nëpër anije të vogla
e struktura të paligjshme, në shtëpi private në zona të humbura. Por, trafiku i njerëzve
është më afër nga sa mendojmë, nënvizoi kardinali Turkson: “Shumë mendojnë se
tregtia e njerëzve të skllavëruar është larg prej nesh. Nuk është e vërtetë. Sipas
përvojës sonë, aty ku popullsia është e moshuar e kërkon asistencë shtëpiake, aty
fillon e rrënjoset skllavërimi. Kur njerëzit merren në punë për t’u kujdesur për të
moshuarit, është e nevojshme të studiohen kushtet, në të cilat bëhet ai shërbim. E
që aty vërejmë shenjat e para të skllavërimit. Prandaj: nuk është e nevojshme të shkojmë
larg, këto fenomene janë fare pranë nesh”. Thirrja për politikanët erdhi nga
themeluesi i Fondacionit “Ec i lirë”, Andrew Forrest: “U kërkoj qeverive të
botës të bashkohen me fetë e mëdha – me anglikanët, katolikët e me myslimanët sunitë
– në përpjekjen për të përfshirë të gjithë në ‘Global Freedon Network’. U kërkoj 193
vendeve të OKB-së të propozojnë që çrrënjosja e skllavërisë të konsiderohet si tregues
kryesor i përmirësimit ekonomik, në mbledhjen e ardhshme të G20-ës. Vërtet, nuk ka
mënyrë më të mirë për të zhvilluar ekonominë se sa vlerësimi i aftësive të gjithanshme
të njeriut e jo vetëm i cilësive të tij trupore”. Anëtarët e Rrjetit Global
të Lirisë njoftuan se do të organizohet një ditë lutjesh për viktimat e trafikut dhe
për lirimin e tyre. Në të do të përfshihen shkollat, familjet, universitetet, pasi
njerëzit duhet të mësohen që së vogli t’i njohin e t’i denoncojnë fenomenet e skllavërimit
e të luftojnë për ta zhdukur këtë plagë nga faqja e dheut.