Françesku, për vizitë baritore në famullinë romake të Zojës së Uratës
Pas Lutjes së Engjëllit të Tënzot, në mesditë, së bashku me mijëra besimtarët e mbledhur
në Sheshin e Shën Pjetrit, sot pasdite, Papa Françesku shkoi për një vizitë baritore
në famullinë romake të Zojës së Uratës, në Setteville të Guidonia-s. Përpara se të
hynte në kishë, Ati i Shenjtë përshëndeti besimtarët, u takua me të sëmurët, me fëmijët
e të rinjtë, që po përgatiten për të marrë Kungimin e Parë e Krezmimin, me bashkësitë
neokatekumenale, si edhe me familjet, që i kanë pagëzuar fëmijët muajt e fundit. Më
pas, rrëfeu disa besimtarë. Vetëm atëherë, Ati i Shenjtë kremtoi meshën, e më
pas u takua me familjarët e meshtarëve të famullisë. Kthimi në Vatikan, rreth orës
20.00. Famullia e Zojës së Uratës është ngritur me dekret të kardinalit vikar
Ugo Poletti, më 1 tetor 1989 dhe i është besuar klerit dioqezan. Kisha famullitare
është përuruar, me ritin e kushtimit, më 15 qershor 2002. Ndërtesë, në ekuilibër me
ambientin e gjelbërimin rrethues, kjo kishë mbledh besimtarë, që më parë shkonin në
meshë në salla të përkohshme. 1400 metrat katrorë të terrenit plot gjelbërim, që e
rrethojnë, janë në dispozion të banorëve të zonës. Edhe struktura e kishës ofron gjashtë
salla në katin e parë dhe një sallë të madhe poshtë, që përdoret për konferenca. Nuk
është hera e parë që një Papë shkon në Setteville të Guidonia-s. Më 5 maj 1985, në
këtë lagje shkeli këmba e Gjon Palit II, pavarësisht se kisha e sotme nuk ishte ndërtuar
akoma. Ndërkaq, sot, Papa Françesku kryen vizitën e tij të pestë në një famulli romake.