«Ուքրանիոյ հողային ամբողջականութիւնը հարցականի տակ չի կրնար առնուիլ», ըսաւ Գերմանիոյ
վարչապետ Անկելա Մերքել
Ռուսիոյ նախագահ Վլատիմիր Փութին երէկ յայտնեց, որ իր երկիրը Ուքրանիոյ մէջ ստեղծուած
տագնապին համար այպանելի չէ: Ան յայտարարեց. «Ուքրանիոյ տագնապը ներքին բնոյթի է եւ Ռուսիա
ատոր հետ որեւէ կապ չունի»: «Ռուսիա (Ուքրանիոյ մէջ. «Ա.») ձեւաւորուած պայմաններուն
ստեղծման նախաձեռնողը չէր»: Սակայն Գերմանիոյ վարչապետ Անկելա Մերքել գերմանական խորհրդարանին
առջեւ իր արտասանած խօսքին մէջ պնդեց, որ Ռուսիա դրացի Ուքրանիոյ տկարութիւնը կը շահագործէ,
փոխանակ իբրեւ կայունութեան գործընկեր մը վարուելու: Ան սպառնաց, որ Եւրոպական Միութիւնը
մագլցողական քայլերու շարք մը կրնայ որդեգրել, եթէ Ռուսիա Ուքրանիոյ մէջ լարուածութիւնը
չմեղմացնէ: «Եթէ Ռուսիա անցնող շաբաթներու ընթացքը շարունակէ, ատիկա Ուքրանիոյ համար
միայն աղէտ մը պիտի ըլլայ», ըսաւ Գերմանիոյ վարչապետը` աւելցնելով. «Մենք` իբրեւ Ռուսիոյ
եւս դրացիներ, զայն միայն սպառնալիք պիտի չտեսնենք, եւ ատիկա ոչ միայն Եւրոպական Միութեան
Ռուսիոյ հետ յարաբերութիւնը պիտի փոխէ: Ո՛չ, ատիկա նաեւ Ռուսիոյ պիտի հասցնէ մեծ վնաս`
տնտեսապէս եւ քաղաքականապէս»: «Ուքրանիոյ հողային ամբողջականութիւնը հարցականի տակ
չի կրնար առնուիլ», ըսաւ ան: Ռուսիոյ տնտեսական զարգացման փոխնախարար Ալեքսէյ Լիխաչիով
յայտնեց, որ Ռուսիա չի բացառեր Միացեալ Նահանգներու եւ Եւրոպական Միութեան կողմէ հաստատուելիք
պատժամիջոցներուն պատասխան պատժամիջոցներու որդեգրումը: «Մենք պատրաստ ենք իրադարձութիւններու
որեւէ զարգացման, կ՛աշխատինք բոլոր տարբերակներուն ուղղութեամբ: Սակայն յոյս ունինք,
որ անոնք ըլլան քաղաքական պատժամիջոցներ եւ ոչ թէ որոշ առեւտրատնտեսական որոշումներու
լայն շարք: Մենք պիտի գործենք հայելային եղանակով», յայտարարած է ան: Պիելոռուսիոյ
պաշտպանութեան նախարարութենէն աղբիւր մը «Ռաշա Թուտէյ»-ին յայտնեց, որ ռուսական օդուժը
Պիելոռուսիոյ «Պոպռույսք» զինուորական օդանաւակայան ուղարկած է 6 «Սուխոյ-27» տիպի կործանիչ
եւ 3 պատերազմական օդանաւեր: Պիելոռուսիոյ նախագահ Ալեքսանտր Լուքաշենքօ մէկ օր առաջ
իր երկրին Ազգային անվտանգութեան խորհուրդի նիստին ընթացքին յայտնած էր. «Պիելոռուսիան
պատշաճ պատասխան պիտի տայ ՕԹԱՆ-ի ուժերու` երկրի սահմաններուն մօտ ամրապնդման»` աւելցնելով.
«Պիելոռուսիան Ռուսիոյ պիտի առաջարկէ լրացուցիչ 15 օդանաւ տեղակայել երկրին մէջ»: