Papa Françesku u dërgon telegram urimi Murgeshave Agostiniane. Kuvendi mbush 450 vjet.
Në një telegram të nënshkruar nga Sekretari i Shtetit, kardinali Imzot Pietro Parolin,
Papa Françesku u shpreh urimet murgeshave agostiniane, të cilat kremtojnë 450 vjetorin
e pranisë së tyre në Manastirin e Katër Shenjtërve të Kurorëzuar, në Romë. Papa
Uron që ky përvjetor të mund t’i forcojë murgeshat “për të mbështetur veprën e përditshme
të Kishës, që ecën mes përndjekjeve të botës dhe ngushëllimeve të Hyjit” dhe u kërkon
“të luten vazhdimisht” për shërbesën e tij petrine. Murgeshat hynë në Manastirin e
Katër Shenjtorëve të Kurorëzuar më 12 mars 1564 dhe sot bashkësia përbëhet nga 13
rregulltare, 2 rishtare dhe dy kandidate. Në Librin e Kujtimeve të Manastirit, ndër
ngjarjet e shumta, kujtohet edhe strehimi i disa hebrenjve, sipas kërkesës së papës
Piu XII. Pyetjes së Radio Vatikanit “cilat janë faqet më domethënëse të këtyre
450 viteve”, motër Giuliana d’Agostini iu përgjigj:
Është e vështirë të
përmbledhësh me pak fjalë 450 vjet histori. Murgeshat i kanë qëndruar gjithmonë besnike
rregullës fillestare, Kishës së Romës, qytetit, kërkesave të njeriut. Shekulli i kaluar,
për shembull, përjetoi dy lufta botërore. Gjatë luftës së parë kanë ndarë me të tjerët
gjithçka, nga buka e gojës tek bari i kopshtit. Gjatë luftës së dytë, sipas urdhrit
të Papës Piu XII, motrat hapën deri edhe dyert e klauzurës, për të pritur vëllezërit
hebrenj dhe partizanët.