Беларусь: прадстаўнікі традыцыйных рэлігій прынялі сумесную Дэкларацыю аб абароне
жыцця
Разам, у голас, за
жыццё. Сёння прадстаўнікі традыцыйных рэлігій Беларусі прынялі сумесную дэкларацыю
аб абароне традыцыйных каштоўнасцяў у сферы дэмаграфіі, праблемы якой у краіне наўпрост
звязаны з абортамі. У праекце дэкларацыі яны замацавалі паняцце штучнага перапынення
цяжарнаці як перапынення чалавечага жыцця, неабходнасці надання ненароджанаму дзіцяці
статуса чалавека, неадпаведнасці нацыянальнага заканадаўства міжнародным нормам аб
абароне маці і дзіця. Хрысціяне, мусульмане і юдэі (а дэкларацыя ўпершыню носіць характар
не толькі міжканфесійны, але і міжрэлігійны) заклікалі ўсе сацыяныя групы насельніцтва
і дзяржаўныя ўстановы пачаць ці прадоўжыць барацьбу за жыццё ненароджаных дзіцей шляхам
змянення законаў, выхавання моладзі, змены інфармацыйнага клімату вакол праблемы абортаў.
Дэкларацыю скіруюць ва ўсе беларускія міністэрствы і ведамствы, а таксама парламент.
Казаць аб гэтым сёння трэба не толькі з амбоны храма, але і ў міністэрствах
і ведамставах, адзначыў у сваім прывітальным слове арцыбіскуп Тадэвуш Кандрусевіч,
Мітрапаліт Мінска-Магілёўскага, да сабраўшыхся, якое зачытаў біскуп Юрый Касабуцкі.
У інтэрв’ю Беларускай рэдакцыі Ватыканскага радыё дапаможны біскуп Мінска-Магілёўскі
адзначыў, што прадстаўнікі хрысціянскіх канфесій, а таксама іншых рэлігій, павінны
выказваць свой погляд на праблему абортаў. “Гэта важная справа для міжнароднай супольнасці,
а таксама для нашай краіны. Захаванне і абарона жыцця моцна залежыць ад прававой базы,
якая існуе ў дзяржаве. Забойства ненароджанага дзіця – гэта забойства. І мы не можам
назваць гэта іншым словам, ад гэтага сутнасць не зменіцца. І мы павінны выказваць
свой погляд, які можа паўплываць на станаўленне пэўных прававых нормаў”, - сказаў
ён.
Аб тым, што пункт гледжання на аборты – адзіны для хрысціян сказаў і прадстаўнік
Беларускай Праваслаўнай Царквы, прэс-сакратар Мінскага епархіяльнага ўпраўлення айцец
Сергій Лепін. Праблема захаваання жыцця – першачарговая для Царквы. Але яна ляжыць
у шматлікіх пласкасцях – гэта аборты, наркаманія, п’янства, а таксама сурагатнае мацярынства,
рэпрадуктыўныя тэхналогіі, што не толькі ненатуральна, але і – ідзе насуперак законам
прыроды, але і грахоўна – супярэчыць задуме Створцы. І толькі агульнымі намаганнямі
можна прабаваць змяняць, як маральныя законы, якія пануюць сёння ў грамадстве, так
і прававыя асновы.
“Адносіны да абортаў – гэта тэма, якая нас аб’ядноўвае.
Вельмі прыемна, што, нягледзячы на адрозненні паміж намі, мы сабраліся, каб выказаць
свой пункт гледжання разам. Звычайна мы выступалі паасобку і магло здавацца, што гэта
прыватны пункт гледжання кожнай з Цэрквай – ці праваслаўных, ці католікаў. Ці потым
юдэяў, мусульман. А тут мы выступаем разам і я спадзяюся, што нашы намаганні не пройдуць
задарма”, - сказаў айцец Сергій.
Трэба адзначыць, што намаганні храсціянскіх
Цэркваў Беларусі ўжо не прайшлі дарма. Прадстаўнікі Каталіцкага Касцёла і Праваслаўнай
Царквы Беларусі выступалі за ўнясенне паправак ў Закон “Аб ахове здароўя”. Некаторыя
з пазіцый усё ж былі прыняты дэпутатамі падчас разгляду законапраекта ў першым чытанні.
У студзені 2013 г. з 10 да 2 пунктаў былі скарочаны сацыяльныя паказанні для правядзення
аборту на тэрміне да 22 тыдняў цяжарнасці. Гэта важны крок у напрамку абмежавання
абортаў, але не зусім эфектыўны. Абсалютная большасць абортаў робіцца на тэрміне да
12 тыдняў. А напрыканцы мінулага года было замацавана права медыкаў адмовіцца рабіць
аборт, што стала сапраўднай перамогай. Бо немалая частка беларускага грамадства –
вернікі, моладзь, неабыякавыя – ужо саспела да гэтых змен, адзначыў Уладзіслаў Валаховіч,
дырэктар Дабрачыннага фонда абароны жыцця і сям’і “Адчыненыя сэрцы”. І гэта толькі
першыя крокі, на якія нельга спыняцца – у пачатку красавіка пачнецца вясновая сесія
ў беларускім парламенце, на якой Закон “Аб ахове здароўя” будзе разгледжаны ў другім
чытанні.
“Гэта наш апошні шанс перад прыняццем гэтага Закона – цяпер, або гэта
будзе адкладзена на нявызначаны час. У ідэале мы хочам унясення папраўкі ў Канстытуцыю
аб тым, што дзіця мае права на абарону з моманту зачацця (такая норма зараз ёсць,
напрыклад, у Канстытуцыі Венгрыі). Але мы будзем рэалістамі – так хутка Кантытуцыю
ніхто не зменіць. Таму зараз мы кажам аб тым, што трэба быць больш жорсткімі ў адносінах
да аборта, як паступілі ў Польшчы ў 1993 г. Калі будзе юрыдычнае пакаранне, людзі
будуць ведаць, што нельга іх рабіць. Мы выступаем у ідэале за поўную забарону абортаў”,
- лічыць Уладзіслаў Валаховіч.
Нягледзячы на паступовыя змены, у Беларусі статыстыка
абортаў застаецца жудаснай. Па некаторых дадзеных, забіваецца 100 ненароджаных дзіцей
кожны дзень, у абсалютнай большасці выпадкаў – па жаданню ўласнай жа маці. Беларусь
да гэтай пары займае трэцяе месца ў свеце па колькасці абортаў. За апошнія 12 гадоў
у краіне не з’явіліся на свет больш за 2,5 млн. чалавек, а фаза дэпапуляцыі (калі
насельніцтва толькі памяншаецца) не перапыняецца. Таму ў вырашэнні гэтай праблемы
павінны быць зацікаўлены ўсе і кожны з нас.