Argjentinë: Kisha kremton përvjetorin e parë të papnisë së Françeskut

Komisioni i përhershëm i Konferencës Ipeshkvore Argjentinase ka shpërndarë një mesazh të shkurtër për përvjetorin e parë të papnisë së Atit të Shenjtë, në të cilin kujton se “zgjedhja e Papës Bergoglio, bashkë me gjestin e përvuajtur dhe të guximshëm të Benediktit XVI, përbën një ngjarje krejtësisht të veçantë të provanisë, për të cilin duhet të falënderojmë Zotin”.
Ipeshkvijtë e Argjentinës, në sintoni me Papën Françesku, përtërijnë angazhimin e tyre, për t’i dhënë Kishës “një hov të ri misionar, për ta çuar tek periferitë gjeografike dhe ekzistenciale të botës, duke treguar fytyrën e mëshirshme të Hyjit”. “Kjo dhuratë e re e Hyjit për Kishën dhe për Botën – shkruajnë prelatët e Argjentinës – na mbush me gëzim dhe na fton të përgjigjemi me bujari dhe pandarë, mbi të gjitha duke u lutur çdo ditë për Papën Françesku, siç na kërkon edhe ai vetë vazhdimisht”. Në fund, ipeshkvijtë marri përsipër ta shoqërojnë ecjen baritore të Kishës argjentinase në dritën e Thirrjes apostolike “Evangelii Gaudium”, me qëllim që të gjithë të mund të përtërihen, me “gëzimin e ëmbël dhe zemërdhënës të ungjillëzimit”.
Kisha argjentinase e feston sot përvjetorin e parë të papnimit të Françeskut me kremtime eukaristike në të gjitha kishat dhe famullitë e vendit. Pritet me padurim intervista ekskluzive, që i ka dhënë Papa një radioje të vogël lokale të lagjes Flores (ku ka lindur Jorge Mario Bergoglio), që do të transmetohet sot në orën 18. Në të njëjtën kohë anëtarët e famullisë Santa Maria del Pueblo do të kenë mundësinë të shohin në ekranet e mëdhenj intervistën televizive të incizuar para pak ditësh në Shtëpinë e Shën Martës në Vatikan.
Në orën 20, në Katedralen e Buesnos Airesit, kryeipeshkvi kardinal Mario Aurelio Poli do të udhëheqë meshën e falënderimit. Gjatë ditës, në Universitetin Katolik të Argjentinës do të mbahen debate dhe konferenca për Thirrjen “Evangelii gaudium”, me pjesëmarrjen e kardinalit Poli, të nuncit apostolik Imzot Paul Tscherrig, të rektorit, Imzot Victor Manuel Fernandez dhe të sekretarit të Komisionit Papnor për Amerikën Latine, Guzman Carriquiry Lecour.