Քերրի իր ռուս պաշտօնակից Սերկէյ Լաւրովին յայտնեց, որ Խրիմի մէջ Ռուսիոյ զինուորական
միջամտութիւնը որեւէ բանակցութիւն կատարելը դժուարացուցած է:
Ռուսիոյ արտաքին գործոց նախարար Սերկէյ Լաւրով երէկ իր ամերիկացի պաշտօնակից Ճոն Քերրիի
հետ հեռաձայնային հաղորդակցութեան մը ընթացքին շեշտեց, որ «անհրաժեշտ է յարգել Խրիմի
բնակչութեան ինքնորոշման իրաւունքը»: Երկու նախարարները համաձայնեցան շարունակելու ուքրանական
հարցին շուրջ քննարկումները: Միացեալ Նահանգներու արտաքին գործոց նախարար Ճոն Քերրի
մերժեց հանդիպում ունենալու Ռուսիոյ նախագահի առաջարկը, մինչեւ որ Մոսկուա Ուքրանիոյ
տագնապին վերաբերեալ ամերիկեան առաջարկներուն ուղղութեամբ քայլեր առնէ: Քերրի իր ռուս
պաշտօնակից Սերկէյ Լաւրովին յայտնեց, որ Խրիմի մէջ Ռուսիոյ զինուորական միջամտութիւնը
որեւէ բանակցութիւն կատարելը դժուարացուցած է: Ռուսիա երկուշաբթի օր յայտնած էր, որ
տագնապը բանակցութեան ճամբով լուծելու ամերիկեան ծրագիրին հակաառաջարկներ կը պատրաստէ: Ամերիկացի
պաշտօնատարներ կ՛ընդգծեն, որ եթէ Խրիմի մէջ Ռուսիոյ միանալու հարցին շուրջ 16 մարտին
նախատեսուած հանրաքուէն տեղի ունենայ, խօսելու տեղ պիտի չմնայ: Միացեալ Նահանգներու
արտաքին գործոց նախարարութեան բանբեր Ճեն Փսաքի յայտնեց, որ «Միացեալ Նահանգներ կարիքը
ունին տեսնելու շօշափելի փաստեր, որ Ռուսիա պատրաստ է Ուքրանիոյ եւ Ռուսիոյ միջեւ ուղղակի
երկխօսութիւնը դիւրացնելու մեր դիւանագիտական առաջարկներուն վրայ աշխատելու եւ տագնապի
լարուածութիւնը մեղմացնելու համար կապի խմբակի նման միջազգային մեքանիզմներ օգտագործելու»: «Քերրի
արտաքին գործոց նախարար Լաւրովին յստակ դարձուց, որ ինք պիտի ողջունէ Ուքրանիոյ մէջ տագնապը
մեղմացնելու շուրջ յաւելեալ քննարկումներ, եթէ եւ երբ շօշափելի փաստ տեսնենք, որ Ռուսիա
պատրաստ է առաջարկներուն վրայ աշխատելու»: Ուաշինկթըն կը յայտնէ, որ ռուսական կողմը
տակաւին Քերրիի Լաւրովի փոխանցած հարցումներուն պաշտօնական պատասխաններ չէ ստացած: Ամերիկեան
կողմը մասնաւորաբար կը հարցնէ, եթէ Մոսկուա պատրաստ է ուքրանական նոր կառավարութենէն
պաշտօնատարներու հետ հանդիպելու: Լաւրով նախագահ Փութինին պատկերասփռուած զեկուցում
մը ներկայացնելով յայտնեց, որ Քերրիի առաջարկները «անյարմար» են, որովհետեւ «յեղաշրջումով
ստեղծուած կացութիւնը իբրեւ մեկնակէտ» նկատի կ՛ունենան: