Atë Lombardi: nga Papa Françesku, impuls i fuqishëm për Kishën
Të shumta, komentet e këtyre ditëve, në prag të 1-vjetorit të zgjedhjes së Papës Françesku
në fronin e Shën Pjetrit, përvjetor që do të festohet më 13 mars, ditën e enjte.
Vit intensiv, që
ka zgjuar vëmendje të re për çështjet kishtare edhe ndër ata, që deri tani, nuk pyesnin
për to. I drejtuam mikrofonin drejtorit të Sallës së Shtypit të Vatikanit, atë Federiko
Lombardi:
Gjëja kryesore e këtij viti është natyrisht vëmendja e madhe,
interesimi i madh i njerëzve – them njerëz, për të mos thënë vetëm katolikë praktikantë,
por të gjithë njerëzit e kësaj bote – pra, interesimi i madh për këtë Papë e për mesazhin
e tij. Është diçka, që mendoj e shpresoj të jetë rrënjosur thellë në zemrat e njerëzve,
të cilët e kanë ndjerë veten të prekur nga një fjalë dashurie, kujdesi, mëshire, afërsie,
me të cilën, përmes Papës si njeri, arrin dashuria e Zotit. Do të kujtoja një sërë
episodesh gjatë këtij viti, që për mua janë veçanërisht prekëse. Duke filluar nga
dalja e parë në llozhën e Bazilikës së Shën Pjetrit e me gjithçka përfaqësoi ai çast,
që ka mbetur i paharrueshëm. Pastaj, kujtoj larjen e këmbëve të të rinjve të burgosur,
të Enjten e Madhe, pasdite. Kujtoj udhëtimin në Lampeduzë, me intensitetin e madh
të afërsisë me njerëzit më të harruar e më të braktisur, si edhe me ata, që vdiqën
në udhëtimin e shpresës e të dhimbjes, drejt një të ardhmeje më të mirë. Kujtoj Ditën
Botërore të Rinisë në Rio, takimin e madh me rininë botërore, veçanërisht amerikanolatine,
që festonte praninë e Papës në kontinentin e tyre. Kujtoj Asizin. Kujtoj dokumentin
programatik – nëse mund të themi kështu – Thirrjen Apostolike “Evangelii Gaudium”,
në të cilin kemi vërtet në dorë zemrën e Papës, shprehur qartë, gjerësisht, si program
i papnisë së tij. Pastaj, Koncistorin e shkurtit. Këto etapa na tregojnë sa intensiv
ka qenë ky vit, sa aspekte janë prekur e sa takime janë zhvilluar. Papa dëshiron
që Kisha të dalë nga sakrestitë, flet për reforma të nevojshme strukturore. Si po
ndryshon Kisha Katolike? Kisha më duket vërtet popull për udhë. Ky është tipari
më karakteristik: ndjehet një dinamizëm i madh. Papa i ka dhënë një shtytje të madhe
dhe ecën bashkë me një Kishë, që kërkon vullnetin e Zotit, kërkon misionin e vet në
botën e sotme, për të mirën e të gjithëve, duke shkuar vërtet drejt periferive, drejt
skajeve të botës. Papa ka folur shpesh për barinjtë, që janë para, brenda, pas grigjës,
për ta ndihmuar të ecë, të gjejë udhën e vet. Më duket se ai është vetë kështu dhe
e fton gjithë Kishën të ecë përpara. Ndjehet fuqishëm një dinamizëm, që karakterizon
veçanërisht udhën sinodale, këtë rrugë të gjatë dy vjeçare, në të cilën Kisha reflekton
për një pikë qendrore të përvojës njerëzore e kristiane, për familjen. Papa
Françesku kujdeset shumë për ata, që i qëndrojnë larg Kishës, dhe i shkund nga plogështia
ata, që bëjnë pjesë në të… Pa dyshim, sepse Zoti i sheh të gjithë. Papa ka
arritur të shpjegojë se interesi i Hyjit, vështrimi i Tij, është për të gjitha krijesat,
për të gjithë njerëzit e botës, pa harruar askënd. Kjo është shumë e rëndësishme e
natyrisht, nuk e ka shpikur Papa Françesku. Por, ai arriti t’i japë një kuptim të
fuqishëm, që njerëzit e ndjejnë thellë. Prandaj, vëmendja, që vjen nga organe shtypi
jo të zakonshme, do të thotë se mesazhi u ka mbërritur. Të gjithë duhet të vihemi
për udhë, kështu që edhe njerëzit, të cilët e ndjenin veten të qetë e të stabilizuar
tashmë, përfshihen në këtë mision të madh e kjo është pozitive. Cilat janë
imazhet më domethënëse, që ju vijnë ndërmend nga viti i parë i papnisë? Më
vijnë ndërmend, sidomos audiencat e përgjithshme të së mërkurës: Papa, që kalon mes
njerëzve, Papa që përshëndet, buzëqesh, takon e, në veçanti, ndalet me të sëmurët.
Fakti që ai i zgjedh, janë të parët që përshëndet pas katekizmit, duke zbritur nga
tremja e duke i kërkuar, më duket shumë domethënës. Të vuajturit, të brishtët, kanë
përparësi në zemrën e Papës dhe të Kishës, sepse këtë përparësi ua jep Ungjilli. Ç’do
të thotë të jesh zëdhënësi i Papës Françesku? Më duket shumë i bukur fakti që
protagonist është vetë Papa, pra, ai që flet me fjalë, të cilat u interesojnë njerëzve,
që bën përshtypje me formulimet e tij, është ai vetë, nuk ka nevojë për ndonjë ndërmjetësim
të veçantë. Kjo, sipas meje, është shumë pozitive. E këtë kam dëshiruar gjithnjë:
që Papa të arrijë drejtpërdrejt, pa distanca, pa pengesa, me fjalët e veta, në zemrën
e njerëzve. Zëdhënësi – po e quajmë kështu drejtorin e Sallës së Shtypit – jep informacione,
të cilat janë më shumë plotësuese, me karakter organizativ, njofton vendimet që merren
e që janë të rëndësishme, por vetë fjala e Papës për njerëzit, për botën e për Kishën
u arrin atyre drejtpërdrejt. Kjo më duket e bukur dhe themelore.