Ռայի Պատրիարքը այցելեց նախագահ Սլէյմանին։

Հանրապետութեան նախագահ զօր. Միշել Սլէյման շաբաթավերջին նախագահական պալատին մէջ ընդունեց մարոնի համայնքի Պշարա Ռայի պատրիարքը, որուն հետ քննարկեց ներքին լիբանանեան իրադարձութիւնները:
Ռայի պատրիարքը հաստատեց, որ հանրապետութեան նախագահութիւնը նման է մայրիի ծառին, որուն արմատները աւելի զօրաւոր կը կառչին հողին եւ աւելի ուժեղ պայքար կը մղեն Լիբանանի ազատութեան եւ գերիշխանութեան համար, երբ փոթորիկներու դիմաց գտնուին:
Ան զօրակցութիւն յայտնեց երկրին միասնականութեան եւ ապահովական կայունութեան համար նախագահ Սլէյմանի ջանքերուն, ինչպէս նաեւ Փարիզի մէջ անոր արձանագրած յաջողութիւններուն` Լիբանանին քաղաքական, տնտեսական եւ զինուորական միջազգային օժանդակութիւն ապահովելու իմաստով:
Ռայի պատրիարքը անհրաժեշտ նկատեց նաեւ կառավարութեան աշխատանքային ծրագիրի մշակումն ու վաւերացումը:
Նախագահ Սլէյմանի այցելեց նաեւ ներքին գործոց եւ քաղաքապետութեանց հարցերու նախարար Նուհատ Մաշնուք: Քննարկուեցան երկրին ապահովութեան վերաբերող հարցեր, ինչպէս նաեւ բանտերու, թմրամոլներու, ահաբեկչութեան եւ Լիբանան հասած սուրիացի գաղթականներուն կապուած խնդիրներ:
Կիներու միջազգային օրուան առիթով նախագահ Սլէյման շնորհաւորեց լիբանանցի կիները` մաղթելով, որ ան բոլոր մարզերուն մէջ շարունակէ իր պայքարն ու ջանքերը` աւելի լաւ ընկերութիւն մը կերտելու նպատակով: