Сакратар Пантыфіка: Папа моліцца на ружанцы каля трох разоў у дзень

Папа Францішак моліцца на ружанцы каля трох разоў на дзень, сказаў асабісты сакратар Пантыфіка мальтыйскі святар кс. прэлат Альфрэд Хуэрэб, нядаўна прызначаны генеральным сакратаром новастворанага Сакратарыяту па эканамічных пытаннях. У інтэрв’ю Ватыканскаму радыё ён адзначыў, што на працягу працоўнага дня Пантыфік “не губляе ні хлівіны”. “Ён працуе нястомна. А калі адчувае патрэбу ў тым, каб зрабіць паўзу, не закрывае вочы ў бяздзеянні, але сядае і моліцца на ружанцы”, - падзяліўся святар і дадаў, што гэта, паводле слоў самаго Папы, дапамагае яму адпачыць. Затым Пантыфік працягвае прымаць людзей. Кс. Хуэрэб нагадаў, што Францішак прачынаецца вельмі рана, моліцца і рыхтуе гамілію, якую плануе прамовіць падчас ранішняй Эўхарыстыі. Пасля гэтага піша лісты, звоніць па тэлефоне, вітаецца з персаналам Дома св. Марты і цікавіцца як пажываюць іх сем’і.

Кс. Альфрэд Хуэрэб, які быў таксама другім асабістым сакратаром Бэнэдыкта XVI, распавёў пра сваю першую сустрэчу з Францішкам. Разам з Папам на пенсіі ён пакінуў Апостальскі палац 28 лютага 2013 г. Але адразу пасля абрання Біскупам Рыма кардынала Берголіа, яго папрасілі, як мага хутчэй, прыбыць у Дом св. Марты. Справа ў тым, што новаабраны Пантыфік не меў асабістага сакратара і нават шматлікую карэспандэнцыю яму прыходзілася разбіраць самаму.

15 сакавіка 2013 г., па прыбыцці ў Ватыкан, кс. Хуэрэб быў запрошаны ў прыватны кабінет Святога Айца. Той трымаючы ў руках ліст паперы, прывітаў святара ўсмешкай і словамі: “Тут у нас праблемы! Хтосьці не вельмі добра казаў пра цябе!”. На самой справе Францішак жартаваў, бо меў у руках рэкамендацыю ад Бэнэдыкта XVI, у якое пералічваліся заслугі яго былога сакратара. Кс. Хуэрэб расказаў, што папа Францішак прапанаваў яму сесці побач і папрасіў дапамагаць у выкананні яго цяжкага задання.

Асабісты сакратар двух апошніх Папаў, адзначыў, што Францішак бачыць у асобе Бэнэдыкта XVI сапраўдны і незаменны дар. “Было б вялікай памылкай не звяртацца да гэтай крыніцы мудрасці і досведу”, - перакананы кс. Альфрэд Хуэрэб. Сам ён лічыць Святога Айца “класічным місіянерам”, які ідзе сярод людзей і знаёміць іх з Евангеллем і Езусам Хрыстом.