10 сакавіка 2014 г.,
папа Францішак, разам з іншымі ўдзельнікамі велікапостных рэкалекцый, разважалі над
евангельскім фрагментам пра вучняў, якія спужаліся буры ў Галілейскім возеры, у той
час калі разам з імі, у лодцы, быў Езус. Паводле рэкалекцыяніста, кс. Анджэла Дэ Данаціса,
гэты ўрывак нагадвае пра актуальную сітуацыю: многія прызнаюць прысутнасць і дзейнасць
Бога, але баяцца, бо маюць памылковае ўяўленне пра Збаўцу – як і вучні, які напоўніліся
“вялікім страхам” перад абліччам буры.
Паводле святара, так адбываецца калі
ў сэрцах не жыве Хрыстус, але ёсць толькі павярхоўная рэлігійнасць – вера ў страшнага
Бога, які не карыстаецца міласэрнасцю. Ад веры мы перайшлі да рэлігійнасці з фарысейскімі
сцвярджэннямі, паводле якіх з граху мы ўздымаемся самі, а аскетычнасць натхняецца
простымі стаічнымі правіламі: “трэба рабіць так і я раблю так”. Але Пан прыходзіць
іншымі шляхамі – неабходна ачысціць душу ад фальшывых вобразаў Бога, каб пачаць сапраўднае
жыццё, лічыць ён.
Адкрыць сэрцы на дзейнасць Святога Духа кс. Анджэла Дэ Данаціс
заклікаў удзельнікаў рэкалекцый яшчэ ў першы дзень духоўных практыкаванняў, 9 сакавіка.
Пасля малітвы нешпараў і кароткага разважання, ён прапанаваў сабраным пражыць гэты
час “амаль у манаскім духу”.