Францішак: Вялікі пост – гэта добрая нагода да навяртання (поўны тэкст)
“Час Вялікага посту
з’яўляецца добрай нагодай для ўсіх нас, каб ажыццявіць шлях навяртання”, - сказаў
папа Францішак у разважанні перад малітвай “Анёл Панскі” на плошчы св. Пятра 9 сакавіка
2014 г. “Адновім абяцанні нашага Хросту: адмовімся ад сатаны і ад ўсіх яго дзеянняў
і спакусаў, каб пайсці па шляху Бога і “ў радасці Святога Духа прыбыць да святаў Пасхі”,
заклікаў Пантыфік. “Евангелле першай нядзелі Вялікага Посту – сказаў Папа – кожны
год расказвае пра эпізод спакушання Езуса, калі Святы Дух, які сышоў на Яго пасля
хросту ў Ярдане, прымушае Яго змагацца з сатаной, на працягу сарака дзён на пустыні,
перад пачаткам Яго публічнай місіі. Спакушальнік імкнецца адцягнуць Езуса ад плану
Айца, менавіта ад шляху ахвяравання сябе, ад любові, якую Ён ахвяроўвае з сябе самога
дзеля адкуплення, і прапануе Хрысту ўзняць лёгкі шлях: поспехаў і ўлады. Змаганні
Езуса з сатаной праходзяць з дапамогай цытатаў са Святога Пісання. Д’ябал, каб завярнуць
Езуса з дарогі крыжа, прапануе Яму ілжывыя месіянскія надзеі: эканамічны дабрабыт,
калі Ён пераменіць камяні ў хлеб; захапляючы і цудоўны стыль жыцця, калі Езус кінецца
ўніз з найвышэйшага пункту іерусалімскай святыні і калі збавяць Яго анёлы; і ў канцы
валадарствы свету і славу іх, ў абмен, калі Хрыстус упадзе і паклоніцца сатане. Гэта
тры групы спакусаў, якія ўсе мы добра ведаем.
Езус рашуча адкінуў усе гэтыя
спакусы і падкрэсліў цвёрдую волю, каб ісці шляхам, вызначаным Нябесным Айцом, без
якіх-небудзь кампрамісаў з грахом і з логікай свету. Заўважце добра як адказвае Езус:
Ён не вядзе дыялога з сатаной, як гэта ўчыніла Ева у зямным раі. Езус ведае добра,
што з сатаной не трэба размаўляць, бо ён занадта хітры. Таму Езус , замест дыялогу,
які вяла Ева, вырашыў схавацца ў Божым Слове і адказвае з сілай гэтага Слова. Будзем
памятаць аб гэтым у момант спакусаў, нашых спакусаў: ніякіх спрэчак з сатаной, але
заўсёды будзем бараніцца Словам Божым. І Яно нас збавіць. У сваіх адказах сатане Пан
– прымяняючы Слова Божае – нагадвае нам, перад усім пра тое, што “не хлебам адным
будзе жыць чалавек, але кожным словам, што выходзіць з вуснаў Божых” (Мц 4,4); і гэта
дае нам сілу, падтрымлівае нас у барацьбе з ментальнасцю гэтага свету, які зводзіць
чалавека да ўзроўню асноўных патрэбаў, у выніку чаго ён губляе голад таго, хто з’яўляецца
праўдзівым, добрым і прыгожым – голад Бога і Яго любоў. Акрамя таго Хрыстус нагадвае,
што “напісана таксама: не будзеш выпрабоўваць Пана Бога твайго” (Мц 4,7), таму што
шлях веры праходзіць таксама праз цемру, сумненні і насычаецца настойлівым цярпеннем
і чаканнем. Езус нагадвае ўканцы, што напісана: “Пану Богу твайму будзеш пакланяцца
і Яму аднаму будзеш служыць” (Мц 4,10); значыць мы павінны вызваліцца ад ідалаў, марнасцяў
і будаваць сваё жыццё на тым, што істотнае.
Гэтыя словы Езуса знойдуць пазней
канкрэтнае пацверджанне ў Яго ўчынках. Яго абсалютная вернасць плану любові Айца прывядзе
Яго, прыблізна праз тры гады, да канчатковага змагання з “князям гэтага свету” (Ян
16,11), у гадзіне мукі і крыжа, і там Езус пакажа сваю канчаткову перамогу, перамогу
любові.
Дарагія браты і сёстры, час Вялікага посту з’яўляецца спрыяльнай нагодай
для ўсіх нас, каб ажыццявіць шлях навяртання, шчыра паразважаць над гэтай старонкай
Евангелля. Адновім абяцанні нашага Хросту: адмовімся ад сатаны і ад ўсіх яго дзеянняў
і спакусаў, таму што ён спакушальнік, каб пайсці па шляху Бога і “ў радасці Святога
Духа прыбыць да святаў Пасхі” (Orazione colletta della I Dom. di Quaresima Anno A).
Пасля
марыйнай малітвы Пантыфік нагадаў вернікам пра заклік міжнароднага “Caritas” пра яго
кампанію супраць голаду ў свеце. Папрасіў таксама малітваў за сябе і супрацоўнікаў
Рымскай курыі, якія прымуць удзел у тыднёвых рэкалекцыях, якія пачнуцца сёння вечарам
у мястэчку Арыча, недалёка ад Кастэль-Гандольфа, прыкладна ў 30 км ад Рыма.