Ամենայն հայոց Գարեգին Բ Կաթողիկոսի օրհնութեան խօսքը կանանց տօնի առիթով
Լուսոյ Խորան Մայր Աթոռ Սուրբ Էջմիածնից Հայրապետական Մեր օրհնութիւնն ու ջերմ շնորհաւորանքներն
ենք բերում սիրելի տիկնանց եւ օրիորդաց` մարտի 8-ի առիթով: Գարնանամուտին, բնութեան
զարթօնքի այս օրերին մարտի 8-յան տօնը խնդութիւն է յաւելում մարդկանց սրտերին` առանձնայատուկ
կարեւորելով կանանց լուսաւոր առաքելութիւնը աշխարհում: Գործունէութեան տարբեր բնագաւառներում
մեր մայրերը, քոյրերն ու դուստրերը իրենց յատուկ սիրով, հոգատարութեամբ ու հաւատարմութեամբ
արդիւնաւորում են իրենց ծառայութիւնը մեր երկրին ու ժողովրդին, ջանքեր ներդնում` ի խնդիր
մեր հասարակութեան բարօրութեան, պետութեան զօրացման, պայծառ ու լուսաւոր գալիքի կերտման:
Ազգային-եկեղեցական մեր անդաստանում անփոխարինելի եւ բացառիկ է կանանց ուրոյն դերն ու
նուիրեալ սպասաւորութիւնը, մասնաւորաբար` ընտանիքների ամրութեան, նոր սերնդի կրութեան
ու դաստիարակութեան գործում: Մայր Աթոռ Սուրբ Էջմիածնից Մեր սրտագին բարեմաղթանքները
բերելով` ի խորոց սրտի աղօթում ենք առ Բարձրեալն Աստուած, որ օրհնութեան ու շնորհների
ներքոյ պահպանի մեր մայրերին, քոյրերին ու դուստրերին եւ զօրացնի ազնիւ ու գովարժան ընթացքով
ծառայելու մեր ժողովրդի եւ Հայրենիքի առաջընթացին: Թող Աստուած Իր Սուրբ Աջի հովանին
տարածեալ պահի բոլոր տիկնանց եւ օրիորդաց վրայ, պարգեւի քաջառողջ արեւշատութիւն, երջանկութիւն
եւ երկնառաք բիւր բարիքներ: