Եւրոպական Միութիւնը Թուրքիոյ տրամադրուած ֆոնտերու չարաշահման դէպքերուն շուրջ հետաքննութեան
սկսած Է
Թրքական «Թուտէյզ Զաման» օրաթերթը կը հաղորդէ, որ Եւրոպական յանձնաժողովը հետաքննութեան
սկսած է` կապուած Թուրքիոյ Եւրոպական Միութեան հետ հարցերով նախարարութեան կողմէ Եւրոպական
Միութեան ֆոնտերու չարաշահման դէպքերուն, որոնք տեղի ունեցած են Թուրքիոյ մէջ փտածութեան
գայթակղութեան մէջ ներքաշուած` նախարարութեան ղեկավար Էկեմեն Պաղըշի օրով: Պաղըշի
շուրջ գոյութիւն ունի այն կասկածը, որ Եւրոպական Միութեան ֆոնտերու եւ նախարարութեան
կից Ազգային գործակալութեան մէջ աշխատանքի տեղաւորման հարցերու մէջ չարաշահումներ կատարած
է` այդպիսով վտանգելով գործակալութեան գործունէութեան համար տրամադրուող միջոցները: Փտածութեան
աղմկայարոյց գայթակղութեան մէջ ներքաշուած Պաղըշը փոխարինած է Մեւլութ Չաւուշօղլու: Եւրոպական
Միութեան հետ հարցերով նախարարութեան Ազգային գործակալութեան մէջ արձանագրուած փտածութեան
դէպքերուն մասին յայտնի դարձած է գործակալութեան նախագահ Մուսա Ճէյլանի` 9 մարտ 2013-ի
ե-նամակէն, որուն մէջ ան կը նշէ Պաղըշի օրէնքին հակասող յանձնարարականները: Ճէյլան գրած
է, որ իբրեւ գործակալութեան նախագահ կը կրկնէ, որ «գործակալութիւնը չի կրնար կատարել
նախարարին յանձնարարականները, որովհետեւ անոնք կը հակասեն կառոյցի կանոններուն»: Վերջերս
հրապարակուած նամակին հիմամբ Եւրոպական յանձնաժողովը հետաքննութեան սկսած է: Եւրոպական
Միութեան եւ Թուրքիոյ միջեւ համաձայնագիրի 27-րդ յօդուածին համաձայն, Եւրոպական յանձնաժողովը
իրաւունք ունի հետաքննութեան սկսելու իր կողմէ յատկացուող ֆոնտերու ապօրինի կառավարման
կասկածներուն պարագային: Եւրոպական Միութեան հարցերով Թուրքիոյ ներկայ նախարար Մեւլութ
Չաւուշօղլու, ի պատասխան հնչող մեղադրանքներուն, ընդգծած է կառավարութեան` «յանուն իր
բարի համբաւի» ստուգուելու եւ հետաքննուելու պատրաստակամութիւնը: «Մենք չափազանց բաց
եւ թափանցիկ ենք նման հարցերու մէջ: Տայ Աստուած` իւրաքանչիւր ոք պիտի տեսնէ զեկուցումը
հետաքննութեան աւարտին», «Հիւրրիյէթ Տէյլի Նիուզ»-ին փոխանցումով ըսած է Չաւուշօղլու
եւ նշած, որ հետաքննութիւնը «սկսած է թրքական կողմին նախաձեռնութեամբ»: Հետաքննութեան
մասին յայտնի դարձած է այն բանէն ետք, երբ թրքական «Թարաֆ» օրաթերթը գրած է Եւրոպական
յանձնաժողովի կրթութեան եւ մշակոյթի հարցերով գլխաւոր տնօրէն Եան Թրուշինսքիի` Մեւլութ
Չաւուշօղլուին, Եւրոպական Միութեան մէջ Թուրքիոյ մնայուն ներկայացուցիչ Սելիմ Ենելին
եւ Ազգային գործակալութեան նախագահ Պիւլենթ Էօզճանին յղած նամակին մասին: