Пантыфік стварыў новы ватыканскі цэнтральны фінансавы орган
Папа 24 лютага 2014
г. прыняў рашэнне стварыць новую структуру для каардынацыі эканамічнай і адміністрацыйнай
дзейнасці Святога Пасаду і Дзяржавы Ватыкан. Cакратарыят па эканамічных пытаннях,
так называецца новы орган, закліканы кансалідаваць існуючыя ватыканскія фінансавыя
структуры і спрасціць кіраванне імі. Ён будзе ўводзіць у жыццё агульнапрынятыя стандарты
бухгалтарскага ўліку, фінансавага кіравання і справаздачнай практыкі, а таксама зоймецца
павышэннем унутранага кантролю і празрыстасці. Новы орган будзе адказваць, між іншым,
за планаванне штогадовага бюджэту Святога Пасаду і Ватыкану і падрыхтоўку падрабязнай
фінансавай справаздачы. Cакратарыят па эканамічных пытаннях будзе рэалізаваць дырэктывы,
сфармулаваныя яшчэ адным новым органам пад назвай – Рада па эканамічных пытаннях,
якая будзе складацца з 15 асоб, 8 кардыналаў і біскупаў і 7 свецкіх экспертаў. На
чале эканамічнага сакратарыяту будзе стаяць прэфект. Ім Святы Айцец прызначыў аўстралійскага
кардынала Джорджа Пэла.
Папа Францішак выпусціў motu proprio пад назвай “Fidelis
et Dispensator Prudens”, якім і абвясціў аб заснаванні новых структур.
Новыя
палажэнні прадугледжваюць таксама ўвядзенне функцыі Генеральнага рэвізора, якога прызначае
Папа, і які будзе ўпаўнаважаны праводзіць праверкі любога органу Святога Пасаду і
Ватыкану ў любы час.
У сённяшняй заяве, апублікаванай Залай Друку, гаворыцца,
што Пантыфік пацвярдзіў ролю Адміністрацыі маёмасці Апостальскай Сталіцы ў якасці
Цэнтральнага банка Ватыкану. Бяззменнай застанецца і фунцыя Бюро фінансавай інфармацыі,
якое працягне ажыццяўляць свае бягучыя заданні па прудэнцыйным наглядзе і рэгуляванні
дзейнасці Святога Пасаду і Дзяржавы Ватыкан.
Прэфекту новага Cакратарыяту
па эканамічных пытаннях было прапанавана пачаць працу як мага хутчэй.