Më 24 shkurt përkujtohet shën Sergji i Cezaresë. Në kohën e perandorit Dioklecian,
gjatë një kremtimi për nder të Zeusit, qeveritari i Armenisë dhe Kapadokisë, Sapricius,
dha urdhër që të gjithë të krishterët e qytetit të mblidheshin për të adhuruar Zeusin.
Midis turmës spikati Sergji, ish-gjykatës, që e kishte braktisur profesionin dhe jetonte
si heremit. Kur iu afrua vendit të kultit, u shuan befasisht të gjithë zjarret, që
ishin ndezur për djegien e flive. Atëherë të krishterët u akuzuan se kishin zemëruar
hyjninë Zeus, duke mos pranuar ta adhuronin. Sergji mori fjalën dhe shpjegoi se pafuqia
e hyjnive pagane shpjegohet vetëm me plotfuqinë e Hyjit të vetëm të vërtetë, të cilin
e adhurojnë të krishterët. Për këtë arsye e arrestuan dhe e dënuan me vdekje, me shpatë. Më
25 shkurt përkujtohet shën Lorenc Bai Ksiaoman. Shën Lorenci, zejtar, pak kohë
pasi ishte pagëzuar, u gjet nën presionin e autoriteteve kineze, të cilat e urdhëruan
ta mohonte fenë e krishterë. Për të mos braktisur fenë, pranoi torturat dhe dënimin
me prerjen e kokës, që u ekzekutua më 25 shkurt 1856. Më 26 shkurt përkujtohet
Shën Aleksandri i Aleksandrisë, ipeshkëv. Përtëriu klerin e asaj dioqeze të rëndësishme,
duke zgjedhur njerëz të drejtë, dhe ndërtoi kishën e madhe të Theonasit. Luftoi kundër
Ariusit, heretik, pasi i kishte bërë të gjitha përpjekjet për t’ia ndryshuar mendjen
në mënyrë atërore. Vdiq në vitin 328. Më 27 shkurt përkujtohet shën Ana
Lain nga Londra, e vejë dhe martire. Pasi i kishte vdekur i shoqi, i dëbuar nga Anglia
për shkak të fesë katolike, ajo bleu një shtëpi për meshtarët në Londër dhe, për këtë
arsye, pësoi dënimin me varje, gjatë mbretërimit të Elizabetës I, më 27 shkurt 1601.
Bashkë me të u dënuan me vrasje me shpatë edhe meshtarët martirë Mark Barkworth, benediktin,
dhe Roxher Filkok, jezuit. Më 28 shkurt përkujtohet i lumi Timote Trojanovski,
meshtar françeskan konventual. U arrestua nën pushtimin nazist të Polonisë dhe u dërgua
në kampin e shfarosjes në Aushvic, ku, i këputur nga vuajtjet e pësuara për shkak
të fesë në Krishtin, më 28 shkurt 1942 mbërriti fundin e udhës së gjatë të martirizimit.
Më 1 mars përkujtohet Shën Albini i Verçelit. Jetoi në shekullin V dhe
u bë ipeshkëv i Verçelit në vitin 452, kur gjenerali Ecius sapo kishte mundur hunët
dhe gotët, të cilët kishin rrënuar gjithçka. Mbi rrënojat e bazilikës së ndërtuar
nga Shën Euzebi dhe mbi varrin e Shën Teofrastit martir, Albini rindërtoi kishën e
re të qytetit. Më 2 mars është e diel, festa e Zotit.