Papa, pentekostalëve: mrekullia e bashkimit të krishterëve ka filluar
“Nostalgji” për bashkimin e të krishterëve: këtë shfaq Papa Françesku në një videomesazh,
realizuar “me gjuhën e zemrës”, siç thotë vetë, xhiruar nga telefoni celular i një
pastori pentekostal, Tony Palmer. Imazhet u bënë publike në një kuvend në SHBA-të
dhe mund të gjenden në Youtube. Jemi vëllezër, thotë Ati i Shenjtë, edhe pse të ndarë.
E bën thirrje që të gjithë ta ndjejnë nostalgjinë e bashkimit: “Të ndarë, sepse
na kanë ndarë mëkatet: mëkatet tona, keqkuptimet e historisë. Një udhë e gjatë mëkati
të përbashkët. Po kush e ka fajin? Të gjithë kemi faj! Të gjithë jemi mëkatarë! Vetëm
njëri është i drejtë: Zoti. Unë kam nostalgji e dua që kjo ndarje të përfundojë e
Zoti të na japë bashkimin”. Ati i Shenjtë shpreh nostalgji për atë “përqafim,
që përshkruhet në Shkrimin e Shenjtë, kur vëllezërit e shën Jozefit, të uritur, shkuan
në Egjipt”. Aty gjetën diçka më të madhe se ushqimi, gjetën vëllain: “Të gjithë
ne kemi para, paratë e kulturës, paratë e historisë, shumë pasuri kulturore, edhe
fetare, tradita të ndryshme, por duhet ta gjejmë njëri-tjetrin si vëllezërit e duhet
të derdhim lot gëzimi, siç bëri Jozefi. Ato lotë na bashkojnë, lotët e dashurisë.
Jemi vëllezër e le ta përqafojmë njëri-tjetrin shpirtërisht. Ta lemë Zotin ta përfundojë
veprën e filluar, sepse kjo është mrekulli. Mrekullia e bashkimit ka filluar”.