Këshilli i kardinajve propozon reformat e dikasterve ekonomike të Vatikanit dhe të
IOR-it
Përfundoi sot mbledhja e tretë e Këshillit të tetë kardinajve, të cilët, që nga 13
prilli i kaluar ndihmojnë Papën në qeverisjen e Kishës e në studimin e një projekti
reformash për Kurien Romake. Sot pasdite, ata u takuan edhe me kardinajtë, anëtarë
të Këshillit të pesëmbëdhjetë prelatëve, që merret veçanërisht me problemet ekonomike
dhe organizative të Selisë së Shenjtë. Zëdhënësi i Vatikanit, atë Federiko Lombardi,
në takimin me gazetarët, sqaroi se Atit të Shenjtë i është dorëzuar një propozim për
reforma: “Këshilli i tetë kardinjave ka punuar intensivisht dhe ka vendosur,
nga ana e tij, disa orientime, të cilat ia ka paraqitur Atit të Shenjtë. Kanë të bëjnë
me dy fusha: njëri, me strukturën e përgjithshme ekonomiko-organizative të Selisë
së Shenjtë dhe, i dyti, me Institutin për Veprat Fetare (IOR), argument më specifik
e i kufizuar”. Atë Lombardi shpjegoi më pas si do të zhvillohet mbledhja e
nesërme në Vatikan, gjatë së cilës, kardinajtë do të diskutojnë temat e Sinodit për
familjen. Ndërkaq, Këshilli i tetë kardinajve do të vazhdojë të takohet nga 28 deri
më 30 prill e nga 1 deri më 4 qershorin e ardhshëm.