Egjipt: mblidhet në Kairo këshilli kombëtar i Kishave
Kryetarët e Kishave më të mëdha të krishtera në Egjipt, ku bën pjesë edhe patriarku
kopt katolik Ibrahim Isaak Sidrak, u mblodhën të martën, pranë katedrales kopte ortodokse
të Shën Markut, në Kairo, për të kremtuar përvjetorin e parë të themelimit të Këshillit
kombëtar të Kishave të krishtera. I pranishëm edhe patriarku kopt ortodoks Tawadros
II. Para një viti, më 18 shkurt 2013, përfaqësuesit më të lartë të pesë Kishave –
kopte ortodokse, kopte katolike, greke ortodokse, protestante dhe anglikane – kishin
nënshkruar, pranë kësaj katedraleje, aktin e themelimit të këtij Këshilli me vlerë
të madhe ekumenike. Sipas ipeshkvit kopt katolik të Asiutit, Kyrillos William, “themelimi
i Këshillit kombëtar të Kishave është një fakt i rëndësishëm për të gjithë ne dhe
frytet e para mund t’i peshojmë që tani në nivelin vendor: gjatë javës së lutjes për
bashkimin e të krishterëve u pa se populli besimtar është i lumtur, kur i sheh kryetarët
e kishave të krishtera duke u lutur së bashku. Këtë vit, për herë të parë, një ipeshkëv
kopt katolik, mëkëmbësi patriarkal Hanna Golta, predikoi në një Kishë kopte ortodokse.
Nuk kishte ndodhur kurrë më parë”. Sipas ipeshkvit kopt katolik të Asiutit, klima
e re e marrëdhënieve ndërmjet anëtarëve të Kishave të ndryshme të krishtera është
krijuar kryesisht falë vullnetit të mirë dhe mendjes së hapur ekumenike të Tawadrosit.
Këshilli kombëtar i Kishave në Egjipt ka një komitet kryesie (i përbërë nga pesë kryetarët
e Kishave të përfshira), një sekretari të përgjithshme (e përbërë nga pesë përfaqësues
të Kishave të ndryshme dhe aktualisht e drejtuar nga prifti kopt ortodoks Bishoy Helmy)
dhe një komitet ekzekutiv, i përbërë prej pesëmbëdhjetë anëtarësh. Nga ky këshill
varen pesëmbëdhjetë komisione, që punojnë në fusha të veçanta, të cilat janë duke
u vënë në veprim dalë-ngadalë. Ndër ta spikat komisioni teologjik, i cili, me kalimin
e kohës, mund të shqyrtojë, në nivel vendor, temat e diskutueshme, si pagëzimi, që
koptët ortodoksë u japin të krishterëve të Kishave të tjera, kur hyjnë në Kishën e
tyre. Atë Bishoy Helmy ka deklaruar para pak kohësh se ndërmjet koptëve ortodoksë
e katolikë ekzistojnë 15 çështje doktrinarë dhe teologjike të pazgjidhura, për të
cilat mund të hapen bisedimet. Për sa u përket çështjeve politike – kujton ipeshkvi
Kyrillos – “statutet sqarojnë se Këshilli nuk merret me to drejtpërdrejt dhe nuk dëshiron
t’i kushtëzojë të krishterët në formimin e lirë të opinioneve të tyre. Por sigurisht,
të gjithë, si qytetarë, e kanë për detyrë të shprehen, kur bëhet fjalë për të mirën
e vendit”.