Папа да вернікаў рымскай парафіі: натхняць адносіны праўдай і шчырасцю
Адносіны з бліжнімі
павінны натхняцца праўдай і шчырасцю. Такую параду папа Францішак даў вернікам парафіі
св. Тамаша з Аквіну, на поўдні Рыма, якую наведаў вечарам 16 лютага 2014 г. Візіт
Пантыфіка быў прымеркаваны да 50-годдзя супольнасці і прайшоў у цёплай, сямейнай атмасферы.
На пачатку Святы Айцец звярнуўся да самых маленькіх парафіян падзяліўшыся з імі надзейным
“рэцэптам” плённага жыцця верай. Паводле Папы, каб навучыцца любіць Хрыста, трэба
адкрыцца на Яго любоў. “Гэта Ён працуе, а не мы! Ён любіць першым!”, - нагадаў Пантыфік.
Затым Папа сустрэўся з вернікамі, якія прынялі сакрамэнт хросту на працягу некалькіх
апошніх месяцаў, з бацькамі, пажылымі асобамі, хворымі, святарамі і членамі Асацыяцыі
сем’яў з дзецьмі інвалідамі. Перад пачаткам Эўхарыстыі, Францішак паспавядаў пяць
парафіянаў.
У гаміліі, прамоўленой без загадзя напісанага тэксту, Папа адзначыў,
што адносіны паміж людзьмі, асабліва жыхарамі аднаго раёна, павінны натхняцца крытэрыямі
праўды і шчырасці. Ён нагадаў, пра тое, што плёткамі можна “забіць” бліжняга і таму
параіў вернікам, у праўдзе перад самімі сабой, паразважаць, што носяць у сэрцы: любоў
ці нянавісць, прабачэнне ці жаданне помсты? “Мы павінны спытаць сябе, што маем унутры,
таму што гэта выходзіць вонкі і робіць зло, калі злое; а калі добрае – выходзіць і
робіць дабро”, - сказаў ён.
Такі шлях, паводле Францішка нялегкі і каб ісці
ім неабходна малітва і дапамога Божая. “Прасіце заўсёды аб гэтай ласцы: ведання аб
тым, што здараецца ў маім сэрцы, каб заўсёды рабіць правільны выбар, выбіраць дабро.
Будзем памятаць, што забруджвае наша жыццё тое зло, якое выходзіць з нашага сэрца”,
- сказаў папа Францішак.