Францішак прыняў на аўдыенцыі Прэзідэнта Рэспублікі Кіпр
15 лютага 2014 г.
папа Францішак прыняў на аўдыенцыі ў Апостальскім палацы Ватыкана Прэзідэнта Рэспублікі
Кіпр Нікаса Анастасіадзіса, які затым сустрэўся з арцыбіскупам Пьетра Паралінам, Дзяржсакратаром
Яго Святасці Папы і арцыбіскупам Дамінікам Мамбэрці, сакратаром па адносінах з дзяржавамі.
Падчас сардэчных перамоваў адзначаліся добрыя адносіны існуючыя паміж Апостальскай
Сталіцай і Рэспублікай Кіпр і абмяркоўваліся тэмы, якія прадстаўляюць для бакоў супольны
інтарэс. Сярод іх: станоўчая роля рэлігіі ў жыцці грамадства, абарона правоў і рэлігійнай
свабоды. Падкрэслівалася супольнае задавальненне аднаўленнем перамоваў па пераадоленні
існуючай сітуацыі на востраве. Бакі выказалі заклапочанасць з прычыны канфліктаў і
палітычнай нестабільнасці ў блізкаўсходнім рэгіёне, якія прывялі да цяжкіх пакутаў
мірнага насельніцтва. Удзельнікі ватыканскай сустрэчы пажадалі, каб хрысціянскія супольнасці
ў розных краінах працягвалі рабіць унёсак ў будаванне будучыні матэрыяльнага і духоўнага
дабрабыту, адзначаецца ў спецыяльным паведамленні Залы Друку Апостальскай Сталіцы,
апублікаваным па выніках аўдыенцыі для Прэзідэнта Рэспублікі Кіпр.