Papa: i krishteri duhet të jetë gjithnjë qengj e ta mundë tundimin për t’u bërë ujk
I krishteri nuk ndalet kurrë, ecën gjithnjë përtej vështirësive. Këtë pohoi sot Papa
Françesku gjatë Meshës, kremtuar në Shtëpinë e Shën Martës. Në sa Kisha kremton festën
e Shenjtorëve Çirili e Metodi, Ati i Shenjtë u ndalua posaçërisht tek identiteti i
dishepullit. Ungjilli, vërejti, kumtohet me gëzim. Ankimet nuk e kënaqin Zotin. E
aq më pak tundimi për t’u bërë ujk ndërmjet ujqve, në një botë, që e përsërit tepër
shpesh shprehjen ‘njeriu është ujk për njeriun”. Po kjo nuk përkon fare me Ungjillin
e Krishtit, që kërkon nga njeriu, të jetë qengj për njeriun.
Si duhet të
jetë, atëherë, dishepulli i Krishtit? Papa Françesku e mori shtytjen nga figura e
Çirilit dhe e Metodit për ta shpjeguar këtë identitet. E, duke komentuar Leximin e
parë, shkëputur nga Veprat e Apostujve, nënvizoi se i krishteri është njeri ‘i dërguar’.
Zoti i dërgon dishepujt e vet, u kërkon të shkojnë përpara. E kjo, vërejti, do të
thotë se i krishteri është dishepull i Zotit, që ecën, shtegton, shkon gjithnjë përpara: “Nuk
mund as të mendohet një i krishterë i palëvizshëm. I krishteri, që rri ngrirë, është
i sëmurë në identitetin e vet të krishterë, ka ndonjë lëngatë identiteti. Të krishterët
janë dishepuj për të ecur, për të lëvizur, për të shkuar. Zoti, e këtë e dëgjuam edhe
nga Psalmi, i fton e u thotë: ‘Shkoni në mbarë botën e kumtoni Ungjillin’. Shkoni!
Ecni! Lëvizni. Ja, sjellja e parë e identitetit të krishterë është të ecë, të lëvizë
e, nëse ndesh vështirësi, t’i kapërcejë”. E kjo, shtoi Papa, i ndodhi Palit
në Antioki të Pisidies, ku hasi vështirësi me bashkësinë e hebrenjve. E atëherë lëvizën
drejt tij paganët. Ecën. Jezusi, kujtoi më pas Papa, na nxit të shkojmë në udhëkryqe
e t’i ftojmë të gjithë: të mirë e të këqij. Kështu thotë Ungjilli, pohoi Ati i Shenjtë:
“Edhe të këqijtë. Të gjithë!”. I krishteri, pra, duhet të ecë, e në se ndesh vështirësi,
t’i kapërcejë, për të kumtuar mbretërinë e Zotit, që është pranë. Një aspekt
tjetër i identitetit të krishterë, vijoi Françesku, është që i krishteri të mbetet
gjithnjë qengj. Sepse është qengj, e duhet të ruhet i tillë. Zoti na dërgon “si qengja
në mes të ujqve”. Por, vijoi Papa, ndonjëri mund edhe të propozojë të përdoret forca
kundër ujqve. Të mendojmë Davidin, vërejti, kur u nis të luftojë kundër filisteut:
deshën ta mbërthejnë me gjithë armaturën e Saulit, aq sa nuk do të mund të lëvizte.
Kështu i stisur, nuk do të ishte më ai vetë, Davidi i përvuajtur, çobani i thjeshtë.
Në fund, la armaturën, mori hobenë dhe e fitoi betejën: “Si qengja…
Mos u bëni ujq… Sepse nganjëherë tundimi të bën të mendosh: ‘Po kjo është e vështirë,
këta ujq janë dinakë, e unë, edhe më dinak se ata, e? Qengj! Jo budalla, po qengj!
Qengj. Me dinakëri të krishterë, po gjithnjë qengj. Sepse po të jesh ti qengj, Zoti
të mbron. E nëse ti je i fortë, si ujk, Ai nuk të mbron, të lë vetëm, e ujqit të hanë
gjallë”. Aspekti i tretë i këtij identiteti, tha Papa, është stili i të
krishterit, gëzimi. Të krishterët, pohoi, janë njerëz plot me gëzim, sepse njohin
Zotin e sjellin Zotin. Nuk mund të ecësh si i krishterë, pa gëzim. Nuk mund të ecësh
si qengj, pa gëzim. Edhe kur ke probleme, kur të trandin vështirësitë, edhe kur gabon
e mëkaton, pohoi Papa, nuk të mungon gëzimi i Jezusit, që fal e ndihmon. Ungjilli,
atëherë, duhet të shkojë përpara, përmes këtyre qengjave të dërguar nga Zoti, që
u prin plot gëzim: “Nuk i bëjnë ndonjë favor Zotit, as Kishës, ata
të krishterë, që zvarriten, duke u ankuar gjithnjë; që jetojnë kështu, të trishtuar,
qaramanë… Ky nuk është stili i dishepullit. Shën Agostini u thotë të krishterëve:
‘Shko, ec përpara, këndo e ec!’. Me gëzim: e ky është stili i të krishterit. Ta kumtojë
Ungjillin me gëzim! E Zoti bën gjithçka. Ndërsa trishtimi i tepërt e hidhërimi i tepërt
na çon në krishterimin pa Krisht; Kryqi i zbraz të krishterët, që janë para varrit
duke qarë, si Madalenën, por pa gëzimin, që u zjen në shpirt sepse gjetën Zotin”. Në
festën e dy dishepujve të krishterë, Çirili e Metodi, tha Papa Françesku, Kisha na
nxit të mendojmë për identitetin e krishterë. I krishteri, ripohoi, është burrë e
grua, që ecën gjithnjë, pa pyetur për vështirësitë e duke i kapërcyer. Ecën si qengj,
pa i shkuar as nëpër mend të mbështetet vetëm në forcat e veta: është burrë e grua,
që ecën, lëviz, shkon përpara me gëzim. Zoti, përfundoi Papa, me ndërmjetësimin e
këtyre Vëllezërve të shenjtë, Pajtorë të Evropës, na dhëntë hirin të jetojmë si të
krishterë, si qengja, përplot me gëzim!