Papa dërgon 28 misione të tjera “ad gentes” të Lëvizjes Neokatekumenale
Sot paradite, Papa Françesku priti në Shtëpinë e Shën Martës, ekipin përgjegjës të
Lëvizjes Neokatekumenale: Kiko Arguello, Carmen Hernandez dhe atë Mario Pezzi. Së
bashku me ta, Ati i Shenjtë nisi presbiterët përgjegjës në 28 “Missio ad gentes” në
Evropë e në SHBA-të. Një nga këto misione do të shkojë edhe në Kosovë. Për këtë takim
me Papën, të dëgjojmë ç’na tha vetë Kiko Arguello: Pati një fjalë për të gjithë
dhe u bëri shenjën e kryqit në ballë; pastaj na tha: “Guxim, ecni përpara, unë jam
me ju! Jam shumë i kënaqur”. Më pas, bëmë një fotografi nën ikonën e Zojës e u gjunjëzuam
të gjithë. Na bekoi e na inkurajoi për të vazhduar në udhën tonë. Papa ishte shumë
i kënaqur… Si veprojnë misionet tuaja “ad gentes”? Këto misione “ad gentes”
janë të mrekullueshme: përbëhen prej katër familjesh, të udhëhequra nga një presbiter,
të cilët shkojnë në zona, ku nuk ekziston absolutisht prania e Kishës, në mesin e
njerëzve jashtëzakonisht të shekullarizuar, të cilëve u bën tepër përshtypje dashuria
e këtyre familjeve me shumë fëmijë, si edhe marrëdhëniet mbinatyrore të tyre me Shpirtin
Shenjt: kjo e prek botën. Sepse Zoti na ka thënë: “Duajeni njëri-tjetrin: në këtë
mënyrë do t’ju njohin si dishepuj të mi e, nëse do të jeni plotësisht një, bota do
të besojë”. Ja, ky është misioni “ad gentes”, në bazën e të cilit qëndron ftesa e
Zotit tonë në Darkën e Mbrame, Testamenti i Zotit tonë Jezu Krishtit, kur, para se
të vuante Mundimet në Kryq, tha: “O Atë, unë në ta e Ti në mua, që të jenë plotësisht
një e bota të besojë se Ti më ke dërguar”. Atëherë, që njerëzit të besojnë se Ati
e ka dërguar Birin për të shpëtuar botën , është e nevojshme të duken marrëdhëniet
e Trinisë Shenjte, Uniteti i përsosur. Për të arritur në Njëninë e përsosur duhet
kaluar përmes Pagëzimit të krishterë. Në masën me të cilën ne e pranojmë Pagëzimin,
mëkati trupor – siç thotë shën Pali – humb forcën e vet e njerëzit nuk gënjejnë më,
nuk thyejnë kurorën, nuk bëhen grykës për para e fillojnë të ndjehen të lirë për t’ju
ofruar Jezu Krishtit e Kishës në ungjillëzimin e ri.