Papa, ipeshkvijve çekë: mbështetje për laikët e transparencë në administrimin ekonomik
Papa Françesku priti sot paradite ipeshkvijtë e Republikës Çeke, ardhur në Romë në
vizitë “ad Limina”. Dy, impenjimet kryesore, që u besoi atyre: ta projektojnë Kishën
e Ungjillin e Krishtit drejt periferive dhe të administrojnë me transparencë e kujdes
pasuritë ekonomike. Në festën liturgjike të shën Cirilit e Metodit, ungjillëzuesit
e popujve sllavë, Papa i këshilloi ipeshkvijtë t’u japin rëndësi laikëve në jetën
krishtare e shoqërore. Periferi, për Atin e Shenjtë, është çdo vend ku Krishti
nuk njihet, ku pengohet, ku shihet me indiferencë. Barinjve, që sot kujdesen për një
grigjë, shtypur nga totalitarizmat e jo shumë viteve më parë, Papa Françesku u kërkon
impenjim për edukimin fetar të besimtarëve, praninë e kualifikuar në botën e shkollës,
duke pasur parasysh se sot, janë shekullarizmi dhe relativizmi ata, që e mbysin shpirtin
e njeriut. Kujdes për laikët, vazhdon Ati i Shenjtë, do të thotë baritori familjare
me vëmendje të veçantë për të moshuarit e të sëmurët, do të thotë prani e katolikëve
në jetën publike, edhe në mjetet e komunikimit. “Varet prej tyre – ngul këmëbë Papa
– dëgjimi i së vërtetës mbi problemet e çastit e konceptimi i Kishës si aleate e njeriut,
në shërbim të dinjitetit të tij”. Më pas, vështrimi i Atit të Shenjtë zhvendoset
brenda Kishës. Bashkësitë e krishtera të jenë mikpritëse, gati për dialog, veprimtare
të pajtimit e të paqes, nxitje që e gjithë shoqëria të punojë për të mirën e përbashkët
e të kujdeset për nevojtarët. Në fushën ekonomike, thotë së fundi Papa, duhet zhvilluar
një sistem, i cili, duke pasur parasysh se mjetet materiale duhet t’i shërbejnë vetëm
misionit shpirtëror të Kishës, të garantojë ç’është e nevojshme për jetën e çdo bashkësie
e për punën baritore. Pasuritë kishtare duhen administruar me transparencë, duhen
ruajtur e mbrojtur, edhe me ndihmën e laikëve të aftë.