Святы Айцец: вернік можа страціць веру з-за жарсцяў і ганарыстасці
Вернік можа страціць
веру з-за жарсцяў і ганарыстасці, а язычнік – знайсці яе дзякуючы пакоры, лічыць папа
Францішак. Падчас ранішняй Эўхарыстыі ў Доме св. Марты 13 лютага 2014 г. Пантыфік
засяродзіўся над прыкладам евангельскай жанчыны – язычніцы, якая ўпала на калені перад
Хрыстом, просячы аздараўлення для сваёй дачкі вельмі пакорным чынам. Паводле Францішка,
гэты фрагмент паказвае “шлях чалавека добрай волі, які шукае Бога”. “Кожны дзень у
Касцёле ёсць людзі, якія маўкліва ідуць гэтым шляхам, каб знайсці Пана, таму што дазваляюць
Святому Духу весці сябе”, перакананы Пантыфік.
“Але ёсць і адваротны шлях”,
- заўважыў ён і прывёў у прыклад Саламона. Ён быў чалавекам мудрым, які атрымаў ад
Бога шмат благаслаўленняў, але калі састарэў, “жонкі ягоныя схілілі сэрца яго да чужых
багоў”. Яго сэрца аслабела і ён страціў веру, падкрэсліў Святы Айцец. Пантыфік адзначыў,
што Саламон быў грэшнікам, але з грэшніка пераўтварыўся ў сапсаванага. Ён не стаў
прасіць прабачэння за грахі, як яго бацька Давід. Ён быў чалавекам мудрым, але ганарыстасць
і жарсці прывялі яго да сапсаванасці – зерне злога прарасло ў яго сэрцы.
Францішак
заклікаў браць прыклад з евангельскай язычніцы – дазволіць, каб у сэрцы прарасло Божае
слова, якое прывядзе да збаўлення і захавае ад сапсаванасці і ідалапаклонства.