Беларусь: хрысціянскія супольнасці і Еўрасаюз пачынаюць праграму сацыялізацыі былых
вязняў
Еўрапейскі саюз і
пасольства Венгрыі супольна з хрысціянскімі супольнасцямі распачынаюць сацыяльны пракет
“Садзеянне інтэграцыі асоб, якія вызваліліся з турмаў Беларусі”. Ён скіраваны на аднаўленне
прафесійнай кваліфікацыі і працаўладкаванне былых зняволеных. Рэалізацыяй праекту
зоймуцца недзяржаўныя арганізацыі “Венгерская экумэнічная служба дапамогі” і беларуская
Міжканфесійная місія “Хрысціянскае сацыяльнае служэнне”. Чальцамі гэтай місіі з’яўляецца
Праваслаўная Царква, Каталіцкі Касцёл і пратэстанцкія супольнасці ў Беларусі. Прадстаўнікі
гэтых канфесій, а таксама Апостальскай Нунцыятуры ў Рэспубліцы Беларусь і Еўрасаюзу
прынялі ўдзел у прэзентацыі праекту 11 лютага 2014 г. у Мінску.
У прыватнасці
кіраўнік еўрапейскай дыпламатычнай місіі Майра Мора падкрэсліла: “Гэты праект мае
некалькі мэтаў: усталяваць партнёрстава паміж дзяржаўнымі і недзяржаўнымі структурамі
дзеля супрацоўніцтва ў галіне рэінтэграцыі былых вязняў у грамадзтва і працоўны рынак.
Я думаю, што гэтыя і іншыя праекты спрыяюць настолькі важнай справе. У сваю чаргу
гэта паказвае сталасць і гатоўнасць любога грамадства спраўляцца са сваімі праблемамі
і не толькі караць, але і перавыхоўваць людзей”.
Праграма працаўладкавання
былых зняволеных будзе арганізаваная ў трох абласцях: Віцебскай, Гродзенскай і Гомельскай.
Праект атрымае экатэрапеўтычны змест. А менавіта – каля Слоніма былыя вязні будуць
даглядаць пчол, у Гарадоцкім раёне – вырошчваць лекавыя расліны, а каля Гомеля былыя
зняволеныя жанчыны будуць вырошчваць агародніну. Працаўнікамі перадусім стануць тыя
людзі, якіх на волі ніхто не чакае і ім няма куды ісці, і якія пажадаюць пэўны час
пражыць пры манастырскіх гаспадарках, бо менавіта на іх базе будзе рэалізавацца праект.
Арганіазатары мяркуюць, што сацыяльна адаптавацца былым вязням напачатку дапаможа
прырода. Бо адной з цяжкасцяў, з якой сустракаюцца былыя зняволеныя пасля выхаду з
турмы – гэтак званая “зэкафобія” грамадзтва. Таксама – размежаванасць у дзеяннях розных
грамадзкіх і нават дзяржаўных структур, якія займаюцца сацыялізацыяй гэтых людзей.
Хрысціянская супольнасць можа дапамагчы дзяржаве арганізаваць і ўпарадкавыаць
гэтую працу, а галоўнае – непасрэдна дапамагчы людзям, кажа дырэктар “Хрысьціянскага
сацыяльнага служэньня”, Мікола Матрунчык: “Мы будзем 90% усіх мерапрыемстваў праводзіць
разам. Гэта будуць і адукацыйныя сэмінары, і на месцах будуць працаваць групы экспертаў.
Тут задача такая: каб мы сталі сапраўднымі партнёрамі дзяржавы. Каб дзяржава ў нас,
хрысціянскіх Цэрквах, прызнала належных, паважных партнёраў і тады мы зможам планаваць
наступныя ініцыятывы з гэтымі мэтавымі групамі, каб разам змяншаць “зэкафобію” ў Беларусі”.
Праект Еўрасаюзу і хрысціянскіх супольнасцяў “Садзеянне інтэграцыі асоб, якія
вызваліліся з турмаў Беларусі” разлічаны на два гады. Паводле арганізатараў, працоўную
рэабілітацыю за гэты час здолеюць атрымаць дзесяткі былых вязняў. Прэс-сакратар Канферэнцыі
Каталіцкіх Біскупаў у Беларусі, кс. Юры Санько кажа, што гэта ня першы сацыяльны праект,
у рэалізацыі якога ўдзельнічае Каталіцкі Касцёл: “У місіі “Хрысціянскае сацыяльнае
служэнне” таксама прымае ўдзел і Каталіцкі Касьцёл, непасрэдна наша Мінска-Магілёўская
архідыяцэзія. Доўгі час, каля пяці гадоў, мы займаліся праграмай ВІЧ-СНІДу. Распрацавана
шмат цудоўных дакументаў – працоўных матэрыялаў для вышэйшых школ, семінарый, таксама
прамовы і казанні для светароў на гэтую тэму. І зараз місія ідзе далей, развіваецца
ў сваім сацыяльным служэнні і наступны крок – гэта праца з людзьмі, якія выходзяць
з месцаў зняволення, а менавіта – працаўладкаванне. Бо ведаем, што вельмі цяжка адбываецца
рэсацыялізацыя – вяртанне гэтых людзей у соцыум. Таму такога кшталту праекты павінны
садзейнічаць, каб дапамагчы гэтым людзям стаць на правільны шлях”.
Першыя
гаспадаркі ў рамках праекту Еўрасаюзу і беларускай хрысьціянскай місіі распачнуць
працу пры манастырах ужо з пачаткам вясны.