Dom Zef Shestani ( 29. 06. 1912 -16. 04. 1990) “Laudetur Iesus
Christus! Ju flet Radio -Vatikani në gjuhën shqipe”. Për dyzet vjet me
radhë ishte pikërisht ky zë, zëri i dom Zef Shestanit, që hapi Programin e gjuhës
shqipe pranë Radio-Vatikanit, të cilin edhe e themeloi. Dom Zefi lindi në Shkodër
më 29 qershor 1912, njëherësh me Shqipërinë e Pavarur. U shkollua në Kolegjin Saverian
të qytetit, ku Zoti e thirri për jetën meshtarake. Të parët menduan ta çojnë për të
vijuar studimet e larta, në Padovë. Ishte viti 1935. Sapo u kthye, Dom Zefi
u emërua zëvendës-famullitar i Shkodrës me seli në kishën e Shën Kollit, në Rus, ku
tha Meshën e parë më 1 janar 1936. Filluan për të 3 vjet veprimtarie të pareshtur.
U mor me të rinjtë, me muzikën, me publicitikën. Nisi t'i hapte baritorisë së Kishës
horizonte të reja, gjithnjë me frymën tradicionale: "Për Fé e Atdhé". Pasi iu kundërvu
pushtimit të Shqipërisë nga Italia fashiste, më 1939, e komunizmit të pafé e të paatdhé,
më 1944, pak kohë para se të binte Shkodra, u detyrua të kalonte në Itali, ku rifilloi
menjëherë edhe më me zell punën në shërbim të idealeve, të cilave u kishte kushtuar
jetën. Në sa shërbente si famullitar në rrethinat e Romës, Selia e Shenjtë e ngarkoi
me detyrën të themelonte Programin Shqip të Radio-Vatikanit. Nuk ishte e lehtë: bashkëpunëtorët
në mërgim ishin të paktë; lidhja me besimtarët në atdhe, e pamundur; çdo fjalë që
thuhej para mikrofonit, mund të krijonte rreziqe të paparashikuara përtej perdes së
hekurt. Gjithsesi ai, që s'ishte trembur nga situata më të vështira, pranoi. Bashkëpunuan
ngushtë me të Zef Pali, me të cilin njihej mirë që në Shqipëri, Andrea Shuli, Gjon
Gjomarkaj e murgesha e parë engjëllore shqiptare, motër Luçia Laca. Bashkëpunëtor
i jashtëm ishte atë Daniel Gjeçaj. Programi i parë i Radio-Vatikanit në gjuhën
shqipe filloi më 3 tetor 1951 me një Udhë Kryqi, që simbolizonte atë udhë në të cilën
po ecnin besimtarët katolikë e mbarë populli shqiptar.Dom Zefi vdiq në Romë më 16
mars 1990. Vijon të jetë mërgimtar! Motra Luçia Laca (Shkodër, 11.05.1918
- Romë, 19.10.2001) Motra e parë engjëllore shqiptare lindi në Shkodër më 11 maj
1918 prej prindërve Rrok e Roza Laca, besimtarë të devoçëm katolikë, të lidhur ngushtë
me Kishën. Vajza vijoi shkollën e motrave stigmatine, ku kreu normalen. Më 1940 mori
rrugën drejt Italisë, për të mos u kthyer më kurrë në atdheun, që mbeti pas perdes
së hekurt. Si kreu studimet në Trieshtë, u largua drejt Romës, ku jetoi në mjedise
rregulltare, fillimisht, në shtëpinë e motrave të Notre Dame. Aty në jetën e saj u
hap një faqe e re: ajo e veprimtarisë pranë Radio Vatikanit, ku u thirr nga Don Zef
Shestani. Filloi punën më 1 tetor 1975, për ta përfunduar më 31 maj 1986, duke u shënuar
në historinë e programit shqip si zëri i parë femëror. E kreu shtegtimin e saj
të gjatë e të shqetësuar mbi tokë, më 19 tetor 2001, në shtëpinë e përgjithshme të
Motrave Engjëllore në Romë. Ende mërgimtare, edhe Motra Luçie, sot pret zgjimin në
varrezën romake të "Prima Porta", në sa zëri i saj ju flet përsëri, nga arkivi ynë:
Zef Palin
(Shkodër, 1910- Romë, 21 nëntor 1977) po e kujtojmë përmes lajmit,
që pati dhënë Radio Vatikani më 21 nëntor 1977, ditën e vdekjes së tij krejt të papritur
e edhe sot, të pashpjeguar. Ja edhe Nekrologjia radiofonike, që përmbledh shkurtimisht
gjithë jetën e ish-kolegut tonë mërgimtar, të cilit iu desh të shtegtonte edhe i vdekur,
po jo drejt Atdheut të dëshiruar: “Mbas një aksidenti automobilistik, ndërroi
jetë, në Romë, një nga bashkëpunëtorët më të vlefshëm të Radio Vatikanit, profesor
Zef Pali, që prej 20 vjetësh bashkëpunëtor i programit shqip të emitentes së Selisë
së Shenjtë. Ishte 67 vjeç. Pasi pati ndjekur Kolegjin Saverian të Jezuitëve në Shkodër,
qe lauruar në Fakultetin e Letërsisë, për t’u kthyer pastaj në Shkodër, ku punoi si
drejtor i shkollës Skanderbeg, duke u dalluar për zell e aftësi didaktike. Bashkëpunëtor
i gazetave më në zë shqiptare, me pseudonimin Flaka, u dallua për patriotizëm, duke
milituar kundër komunistëve në luftën civile e duke u përpjekur gjithnjë për lirinë
e vendit nga çdo lloj pushtuesi. Pas vendosjes së regjimit të Enver Hoxhës, u largua
nga vendi, në drejtim të Italisë, ku dha gjithnjë dëshmi kristiane koherente e guximtare.
Në Radio Vatikan nisi të punonte që më 1955...”. E pikërisht nga porta e Radios
po dilte më 21.11.1977, kur një makinë kaloi papritmas mbi trupin e tij, duke e flakur
në rrugë, pa ndjenja. E ashtu mbeti deri më 21.11.1977, kur ndërroi jetë, viktimë
e këtij aksidenti të çuditshëm, të pashjegueshëm e pa fajtor, për të cilin në atë
kohë u fol shumë. Trupin e tij e mbartën miqtë nga Roma, në Amerikë, për ta varrosur
pranë Mit’hat Frashërit, themelues i Ballit Kombëtar, në varrezën “Ferncliff” të Nju
Jorkut, më 3 dhjetor 1977, pas një ceremonie në të cilën morën pjesë figura të njohura
të mërgatës e mërgimtarë të thjeshtë shqiptarë, ardhur, për t’i dhënë lamtumirën e
fundit, nga të katër anët e viseve, ku strehoheshin, gjithnjë me ëndrrën e kthimit
në Atdhe. Shkëputëm, nga arkivi ynë, një lajm, dhënë vite më parë nga Zef Pali,
që tingëllon tejet aktual: Andrea Shuli (25.
09. 1920-) u lind në Shkodër, më 25 shtator 1920. U shkollua në vendlindje e në
Itali, ku kreu fakultetin e letërsisë, pranë Universitetit të Padovës. Emri i tij
nisi të dukej shpejt në shtypin shqiptar të kohës, ku dha mendime me vlerë për ardhmërinë
e letrave shqipe, pushtuar asokohe nga shterpësia. Shkrimet i mbetën të shpërndara
në shtypin e kohës. Kushtet e rënda, të krijuara pas vitit 1944, e gjetën në Itali,
duke ia mbyllur përgjithmonë kufijtë e Atdheut. U detyrua të merrte shtetësinë dhe
shoqen e jetës italiane, zonjën Editta Avellino (5 janar 1943) me të cilën jetoi ca
kohë në Padovë e pastaj në Romë. Pati dy fëmijë, Anën (lindur më 1943) dhe Karlën
(1947). Kur u themelua Programi i Gjuhës shqipe pranë Radio Vatikanit, më 3 tetor
1951, ishte tashmë i njohur në rrethet e gazetarisë italiane, i pranuar që më 1945
në Urdhërin e gazetarëve, shoqatë profesionale punonjësve të shtypit. Dom Zef
Shestani, në kërkim bashkëpunëtorësh, e ftoi të jepte ndihmesën në veprimtarinë që,
në ato kohë të vështira, e kishte nisur vetëm me një bashkëpunëtor të jashtëm: atë
Daniel Gjeçajn. Andrea Shuli e nisi bashkëpunimin në Radio Vatikan në vitin 1968,
për të dalë në pension më 31. 12. 1988. Nuk kemi më asnjë të dhënë për jetën e tij.
Atë
Danjel Gjeçaj (14.11.1913-30.08.2002) lindi më 14 tetor 1913 në Theth të Dukagjinit.
Mësimet e para i kreu në vendlindje e në Kolegjën Françeskane të Qytetit. Si kandidat
për françeskan, vijoi liceun “Illyricum” të fretërve, me profesorë figurat më në shenjë
të françeskanizmit shqiptar: Fishtën, Harapin, Prennushin, Marlaskajn, Bardhin, Sirdanin,
Gjokën. Në vitin 1936 kreu liceun e filozofinë. Më 1933 përfundoi noviciatën, veshi
zyrtarisht zhgunin e Shën Françeskut dhe u dërgua nga eprorët në Sienë të Italisë,
ku studioi nga viti 1936, deri më 1939 e ku mori urdhërin e meshtarisë e tha edhe
Meshën e parë. Më pas u dërgua të vazhdonte mësimet në Fuldë të Gjermanisë (1939-1940).
U rikthye më 1940 në Atdhe, në kuvendin e Gjuhadolit, ku punoi si bibliotekar (1940-41),
për të vijuar misionin si nëndrejtor i Kolegjës françeskane në Shkodër e për të nisur
një seri predkesh, që u ndoqen me interes të madh nga popullsia shkodrane. Më 1946,
mbas mbylljes së instituteve fetare, shkoi në Plan. Më 1948, kundërshtar i rreptë
i diktaturës, kaloi në Jugosllavi, ku jetoi deri më 1955. Në këtë vit kaloi në Itali,
ku rifilloi misionin si edukator i Kolegjës të Provinçës së Toskanës; më 1957 ishte
përgjegjës i kulturës në Komitetin Shqypnia e Lirë, në kuadrin e veprimtarisë të të
cilit ribotoi “Lahutën e Malcís”(1958). Më vonë u emërua nga Selia e Shenjtë përfaqësues
i katolikëve shqiptarë në mërgim. Qe bashkëpunëtor i jashtëm që me themelimin
e Programit të Gjuhës Shqipe në Radio Vatikan. Vdiq në Romë, më 30 gusht 2002.