Mesazhi i Papës Françesku për DBR ndër-territoriale në Senegal
“Të dashur të rinj, ju kërkoj të luteni gjithmonë për paqen në botë e, në veçanti,
në rajonin e Casamancës”: me këto fjalë iu drejtua Papa Françesku të rinjve, në një
mesazh, që u lexua të dielën, gjatë meshës me të cilën ata mbyllën kremtimin e Ditës
Botërore të Rinisë, në Stadiumin e Kaolakut, në Senegal. Bëhet fjalë për kremtimin
ndër-territorial të Ditës Botërore të Rinisë 2014, ku morën pjesë 25 mijë të rinj,
nga shtatë dioqezat e Senegalit, por edhe nga Gambia, Mauritania, Guinea Bissau, Kepi
i Gjelbër, Guinea Konakri, Mali, Togo, Burkina Faso, Bregu i Fildishtë, Benini e Gana.
Mesazhin e lexoi nunci apostolik, Imzot Loius Mariano Montemayor, i cili u kërkoi
të rinjve të angazhohen për vendosjen e paqes në Senegal e të luten për pajtimin e
zemrave. Takimi kishte për qëllim t’u krijonte të rinjve mundësinë për të ndenjur
së bashku, me qëllimin për të zhvilluar paqen, drejtësinë, pajtimin dhe zhvillimin.
Lutja, dëshmitë dhe shkëmbimi i mendimeve janë format me të cilat, gjatë takimeve
të tilla, përjetohet dhe përforcohet feja. Kjo është dita e pestë e rinisë në Senegal,
pas atyre në Dakar (1996 e 2000), Ziguinkor (2005) e Thies (2009), në vazhdën e Ditëve
Botërore të Rinisë, të nisura nga Gjon Pali II. Dita Botërore e Rinisë e ardhshme
do të zhvillohet në vitin 2019 në Dakar, prandaj Kryqi, që rri në sfondin e këtyre
ditëve, iu dorëzua kryeipeshkvit të kryeqytetit senegalez, Kardinalit Theodore Adrien
Sarr. Kardinali Sarr u tha të rinjve se Konferenca e ipeshkvijve të Afrikës Perëndimore
do të projektojë ditët botërore të rinisë rajonale dhe i nxiti pjesëmarrësit në takimin
e Kaolakut të jenë mirsionarë, të shpallin të vërtetën, të kumtojnë shpëtimin, të
jenë flamurtarë të gëzimit, të dëgjimit të ndërsjellë..., dëshmitarë besnikë të pranimit
dhe përjetimit të Fjalës së Hyjit”.