Ватыканскі дыпламат: заўвагі ААН супярэчаць Канвенцыі аб правах дзіцяці
Апостальская Сталіца
са здзіўленнем прыняла Заключныя заўвагі Камітэта ААН па правах дзіцяці, прадстаўленыя
4 лютага 2014 г. у Жэневе, адзначыў Пастаянны назіральнік Апостальскай Сталіцы пры
ААН і іншых міжнародных установах у Жэневе, арцыбіскуп Сільвана Тамазі. У дакуменце
ўтрымліваюцца абвінавачванні ў адрас Святога Пасаду, звязаныя з сексуальнымі злачынствамі
прадстаўнікоў духавенства. Камітэт сцвердзіў, што Апостальская Сталіца працягвае парушаць
канвенцыю аб правах дзіцяці, а таксама абрынуўся з крытыкай на пазіцыю Касцёла адносна
гомасексуалізма, кантрацэпцыі і абортаў.
Пастаянны назіральнік выказаў меркаванне,
што дакумент быў падрыхтаваны яшчэ перад сустрэчай Камітэта з дэлегацыяй Святога Пасаду
і не быў дапоўнены. Апостальская Сталіца “прадставіла дакладныя адказы на розныя пункты,
якія не былі ўнесены ў гэты заключны дакумент ці прынамсці не былі ўзятыя пад сур’ёзную
увагу”, сказаў ён. Паводле ватыканскага дыпламата, у дакуменце не адзначаны тыя намаганні,
якія былі ўзняты Святым Пасадам, Дзяржавай Ватыкан і рознымі епіскапатамі на карысць
абароны дзяцей, і якія “цяжка знайсці” у дзейнасці іншых структур ці нават дзяржаў.
Арцыбіскуп
Тамазі адзначыў, што некаторыя з абвінавачванняў ААН з’яўляюцца “некарэктнымі” і нават
супярэчаць самой Канвенцыі аб правах дзіцяці. “Напрыклад, Канвенцыя ў сваёй прэамбуле
кажа аб абароне жыцця і абароне дзіцяці перад і пасля нараджэння, у той час як у бок
Апостальскай Сталіцы робіцца парада – змяніць пазіцыю па пытанні абортаў!”, - заўважыў
іерарх. “Калі дзіця забіваецца – яно не мае больш правоў”, - падкрэсліў ён і дадаў,
што ў гэтым галоўная супярэчнасць з фундаментальнымі мэтамі Канвенцыі – бараніць дзяцей.
Дыпламат
лічыць, што Камітэт па правах дзіцяці не аказвае “вялікай паслугі” ААН спрабуючы прымусіць
Святы Пасад адмовіцца ад свайго навучання. Тым не менш, Апостальская Сталіца намерана
працягваць канструктыўны і адкрыты дыялог, ёй няма чаго хаваць, і гатова працягваць
даваць адказы на пытанні, неабходныя для дасягнення галоўнай мэты – абароны дзяцей,
адзначыў арцыбіскуп Тамазі ў інтэрв’ю Ватыканскаму радыё.
Гаворачы пра прычыны
негатыўнага характару заўвагу ААН і іх “ідэалагізаванай лініі”, іерарх выказаў меркаванне,
што гэта можа быць звязана з уплывам неўрадавых арганізацый, да сферы інтарэсаў якіх
адносяцца пытанні гомасексуалізму і іншыя.